Кормандони милитсия сокини 34-солаи шаҳри Душанбе ва ҳамроҳи ӯ – сокини 27-солаи ноҳияи Рӯдакиро ба гумони даст доштан дар ғоратгарӣ боздошт намуданд.
Бино ба иттилои маркази матбуоти ВКД Тоҷикистон, боздоштшудагон охири моҳи ноябри соли гузашта дар кӯчаи Ҷ.Расулови пойтахт бо тариқи зӯроварӣ аз ҷавонзани 18-солаи сокини пойтахт як адад гарданбанди тиллоӣ ва як адад телефони мобилии тамғаи “АСЕР”, ки маблағи умумии онҳо 2500-сомониро ташкил медиҳад, тасарруф намуда, аз ҷойи ҳодиса ғайб задаанд.
«Дар натиҷаи гузаронидани чорабиниҳои оперативӣ-ҷустуҷӯӣ кормандони милитсия марди 34-солаи сокини шаҳри Душанберо, ки пеш бо моддаи 237 (авбошӣ) ва 244 (дуздӣ)-и Кодекси ҷиноятии Ҷумҳурии Тоҷикистон суд шудааст ва шарики ӯ марди 27-солаи сокини ноҳияи Рӯдакиро бо гумони содир намудани ҷинояти мазкур дастгир намуданд», – омадааст дар маълумоти ВКД.
Гуфта мешавад, нисбати гумонбаршудагон парвандаи ҷиноятӣ оғоз шуда, тафтишот давом дорад.
