Дар ҷараёни амалиёти нерӯҳои ҳукуматии Афғонистон дар вилояти Қундузи ҳаммарз бо Тоҷикистон 71 ҷангии гурӯҳи тундгарои «Толибон» ба қатл расонида шудаанд. Дар ин бора хабаргузории
Khaama
бо такя ба манбаъҳояш дар нерӯҳои амниятӣ иттилоъ додааст.
Сардори пулиси вилоят Муҳаммад Қосим Ҷангалбах ба рӯзноманигрон дар ин робита хабар додааст, ки дар мавзеи Дашти Арчи низомиён 61 нафар ҷангиён, аз ҷумла 3 тан аз фармондеҳон ва боз 10 нафар толибонро дар мавзеъҳои Чордара ва Хонобод нобуд кардаанд.
Ҳамчунин бо истинод ба фармондеҳи дивизияи 20-уми артиши миллии Афғонистон «Помир» генерал Муайюдин Гурӣ ВАО иттилоъ медиҳанд, ки рӯзи якшанбе дар қаламрави вулусволии Хонободи вилояти Қундуз амалиёти нобудсозии гурӯҳҳои ҷиноятпеша гузаронида шудааст.
«Дар ҷараёни амалиёт 12 ҷангӣ кушта ва 8 нафари онҳо захмӣ шуда, нерӯҳои низомии ҳукумат боз 5 тан аз ҷангиёни ҳаракати ифротгарои «Толибон»-ро боздошт намуданд», – иттилоъ медиҳад
«Интерфакс»
бо такя ба гуфтаҳои ин фармондеҳ.
Бино ба маълумоти генерал, айни замон ҳудуди 2,5 ҳазор ҷангиён дар қаламрави вилояти Қундуз қарор доранд, ки тақрибан 200 нафарашон хориҷиён мебошанд.
