Суди Пресненскии шаҳри Маскав дар бораи ба муддати ду моҳ, то 29 апрел ба ҳабс гирифтани Гулчеҳра Бобоқулова, ки рӯзи 29 феврал духтарчаи 4-соларо ба қатл расонид, қарор қабул кард.
Ба гуфтаи судя, Бобоқулова шаҳрванди Ӯзбекистон буда, дар Маскав ғайриқонунӣ қарор доштааст ва аксаран дар хонае, ки кӯдакро кушт, зиндагӣ мекардааст. Зикр мегардад, ки дар сурати чораи дигари нисбатан сабуктар андешидан, зан метавонад пинҳон шавад ва ҳамчунин барои ҳаёту саломатии шахсони дигар хатар эҷод кунад.
Қобили зикр аст, ки қабл аз ҷаласаи суд зан ба саволи ба гуноҳаш иқрор шудан мусбат посух дода, ба саволи дилаш сӯхтан ба духтарча манфӣ сар ҷунбонидааст. Аз паси панҷара Бобоқулова табассум карда, ба рӯзноманигорон дастафшонӣ ва ба ҳама салом гуфтааст.
Гулчеҳра Бобоқуловаро пулиси Русия рӯзи 29 феврал бо сари буридаи кӯдак ва нидои “Аллоҳ Акбар!” дар назди истгоҳи метрои Маскав дастгир кард. Бино ба иттилои Радиои Озодӣ, ин зан, ки либоси сиёҳ дар тан ва рӯймоли исломӣ дар сар дошт, ба гуфтаи шоҳидон, “Аллоҳ Акбар!” гӯён нидо мекард ва каллаи кӯдаки кушташударо алвонҷ медод. Баъди чанд лаҳза пулис ин занро ба замин хобонда, дастгир кард.
https://www.youtube.com/watch?v=7jbl5ySsIpY
