Вазорати энергетика ва захираҳои оби ҷумҳурӣ маълумот дар бораи воридоти омехтаи бензин дар ҳаҷми 2,9 млн. литр (тақрибан беш аз 2,5 ҳазор тонна) ба Тоҷикистонро дар моҳи январи соли ҷорӣ рад мекунад.
Ёдрас мекунем, ки қаблан ВАО-и хориҷӣ бо истинод ба Ширкати миллии нафтии Эрон (NIOPDC) дар ин робита
иттилоъ дода буданд
, ки Тоҷикистону Эрон дар бораи интиқоли омехтаи бензин ба мувофиқа расида, айни замон Эрон аллакай ба Тоҷикистон 2,9 млн. литр ин навъи омехтаи бензинро таҳвил додааст ва минбаъд ҳаҷми воридот меафзояд.
Дар ҳамин ҳол, сардори Раёсати истихроҷ, коркард ва таҳвили нафту гази Вазорати энергетика ва захираҳои оби ҶТ Ёраҳмад Бегаҳмадов ба «Азия-Плюс» дар ин робита иттилоъ дод, ки ин маълумот асоси воқеъӣ надорад. «Аввал бояд бигӯям, ки барои қабули чунин ҳаҷми бензин алҳол дар мо зербинои зарурӣ вуҷуд надорад», – гуфт ӯ.
Дар идома номбурда изҳор кард, ки ин навъи омехтаи бензин пеш аз истифода дар автомашинаҳо ба коркард ниёз дорад.
Бо такя ба маълумоти омории Хадамоти гумруки назди ҳукумати ҶТ Ё.Бегаҳмадов қайд кард, ки соли 2015 аз Эрон ба Тоҷикистон ҳамагӣ 258 тонна маҳсулоти нафтӣ ворид шудааст.
Ба гуфтаи ӯ, моҳи январи соли равон ба ҷумҳурӣ 77 ҳазору 846 тонна маҳсулоти нафтӣ ворид гардидааст.
Аз ҷумла ба ҷумҳурӣ маҳсулоти нафтӣ аз Русия (48 ҳазору 780 тонна ё худ 62,7% аз ҳаҷми умумӣ), Қазоқистон (18 ҳазору 606 тонна ё худ 23,9%), Туркманистон (10 ҳазору 47 тонна ё худ 12,9%), Беларус (62 тонна ё худ 0,1%), Қирғизистон (16 тонна), Украина (6 тонна) ва дигар кишварҳо (275 тонна ё худ 0,4%), аз ҷумла Эрон (242 тонна) ворид шудааст.
