Раиси шаҳри Душанбе Маҳмадсаид Убайдуллоев ифтитоҳи хатсайрҳои нави нақлиёти ҷамъиятӣ дар пойтахтро бидуни қарори дахлдори раиси шаҳр манъ кард.
Тавре ба «Азия-Плюс» як манбаъ аз мақомоти шаҳрдории пойтахт дар ин робита иттилоъ дод, минбаъд ҳамчунин тағйири хатсайрҳои амалкунандаи нақлиёти ҷамъиятии шаҳри Душанбе бидуни қарори раиси шаҳр манъ карда мешавад.
Ба иттилои манбаъ, раиси пойтахт ба сохторҳои марбутаи шаҳрдории пойтахт ҳамчунин дастур додааст, ки хатсайрҳои нави нақлиёти ҷамъиятӣ ба маҳаллаҳои аҳолинишини гирду атрофи шаҳрро, ки палатаи болоии парлумон ба қаламрави пойтахт ҳамроҳ кард, омода ва барои тасдиқ пешниҳод кунанд.
Ёдрас мекунем, ки қаблан дар ҷаласаи васеи шаҳрдорӣ раиси пойтахт ба директори МД «Душанбенақлиётхидматрасон» Абдулҳақ Алиев ва сардори Раёсати Хадамоти давлатии назорат дар соҳаи нақлиёт Файзиддин Камолов барои бартараф кардан камбудиҳо дар ин самт
як моҳ муҳлат дод.
