Бо мақсади ширкат дар баргузории як силсила чорабиниҳо бахшида ба омӯзишҳои умумимиллӣ оид ба коҳиши оқибатҳои офатҳои табиӣ як ҳайат аз Кумитаи ҳолатҳои фавқулодда ва мудофиаи гражданӣ (КҲФ ва МГ)-и назди Ҳукумати Ҷумҳурии Тоҷикистон бо сарварии мувоини Раиси Кумита полковник Мухаммадчон Салимзода ба Ҷопон сафар кард.Дар аввалин рӯзи ин омӯзишҳо Сарвазири Ҷопон ҷаноби Синдзо Абэ ширкат намуд.
Бино ба иттилои дафтари матбуоти Кумита, рӯзи якуми сентябр ҳайати Кумита бо фаъолияти базаи асосии мунтақавии Раёсати офатҳои табиӣ ҳангоми ба вуҷуд омадани ҳолатҳои фавқулодда, ҳамчунин кори ҳамарӯзии он шинос шуданд.
Ҳайат бо роҳбарони раёсат мулоқот кард ва дар ҷараёни он табодули афкор дар иртибот ба рушди алоқаҳо, дурнамои ҳамкориҳо баргузор шуд, масъалаҳои барои ҷонибҳо муҳим мавриди баррасӣ қарор гирифтанд.
Ҳамчунин, ҳайати КҲФ бо мувоини вазир оид ба офатҳои табиии Котиботи Кобинаи вазирони Ҷопон Йохэ Матсумот, бо вазири молия, вазирони заминҳои давлатӣ, нақлиёт, ифраструктура ва сайёҳӣ, бо сарварони ҷамъиятҳои шаҳрдории Токио, бо роҳбарони маркази маъмурии префектураи Хиого-шаҳри Кобэ мулоқот хоҳад кард.
Дар доираи ин сафар ҳайат аз як мактаби Токио дидан хоҳад кард, ки дар он мизбонон ба меҳмонони тоҷикистонӣ амалкарди хонандагон ва омӯзгорон дар ҳолатҳои эҳтимолии офатҳои табииро нишон хоҳанд дод.
Дар вохӯриҳо масъалаҳои коҳиши хатари офатҳои табиӣ дар Ҷумҳурии Тоҷикистон, таҳкими зарфиятҳои омодасозӣ ва бозомӯзии кадрҳо ва дигар масъалаҳо мавриди суҳбат қарор хоҳанд гирифт.
Маврид ба ёдоварист, ки ҳар сол 1-уми сентябр дар Ҷопон омӯзишҳои умумимиллии омодагиҳо ба офатҳои табиии эҳтимолӣ баргузор мешаванд. Соли 1923 маҳз дар ҳамин рӯз дар шаҳри Кантои ин кишвар заминларзаи шадид рух дода буд, ки тӯфони шадиди баҳриро ба дунбол дошт ва дар он бештар аз 100 000 нафар қурбон шуданд.
