Дар Вазорати фарҳанг ва варзиши Қазоқистон вохӯрии сафири Тоҷикистон Назирмад Ализода бо вазири фарҳанг ва варзиши Қазоқистон Аристанбек Муҳаммедиули баргузор гашт.
Бино ба иттилои Вазорати корҳои хориҷии ҷумҳурӣ, зимни мулоқот ҷонибҳо доираи васеи масъалаҳои рушд ва густариши ҳамкориҳоро дар соҳаи фарҳангу варзиш муҳокима намуда, ташкил ва гузаронидани намоишгоҳҳои муштарак, рӯзҳои фарҳангӣ, конфронсу вохӯриҳо, инчунин табодули таҷриба байни ансамблҳо ва гурӯҳҳои эҷодии Тоҷикистону Қазоқистонро ба мақсад мувофиқ шумориданд.
Роҳбари намояндагии дипломатии тоҷик барои мусоидат дар ташкил ва гузаронидани чорабиниҳои фарҳангӣ бо иштироки устодони санъати Тоҷикистон дар моҳи сентябри соли ҷорӣ бахшида ба 25-умин солгарди Рӯзи Истиқлолияти Давлатии Ҷумҳурии Тоҷикистон ба роҳбарияти Вазорати фарҳанг ва варзиши Ҷумҳурии Қазоқистон миннатдорӣ баён намуд.
