Дар бораи пинҳонӣ кӯчонидану дар дигар ҷой гӯронидани ҷасадҳои афроди маъруф аз боғи Айнӣ ба «Азия-Плюс» яке аз хешу ақрабои онҳо хабар дод. Ӯ аз он дар шигифт аст, ки баъди воқеа ба онҳо хабар додаанд.
Пайвандону наздикони Боқӣ Раҳимзода, Муҳаммад Осимӣ, Камол Айнӣ ва Муқаддима Ашрафиро дар бораи ба қабристони Лучоб кӯчонидани ҷасадҳо баъди сурат гирифтани воқеа огаҳ кардаанд.
ИЗОБРАЖЕНИЕ Қабри Камол Айнӣ ва Муқаддима Ашрафӣ
«Ман он ҷо рафтам, моро аз ҳукумати ноҳияи Исмоили Сомонӣ баъди воқеа огоҳ карданд, – гуфт яке аз хешу ақрабои онҳо. – Моро ба он ҷо даъват накарданд, ки аз ин норозием. Ҳарчанд мансабдорон мегӯянд, ки гӯё ин ҷо макони фароғату истироҳат мешаваду кӯчонидани ҷасадҳо ба хотири эҳтироми ёдбуди наздикони мо сурат мегирад, ба ҳар ҳол, фикр мекунам, ки ин амал нодуруст аст, зеро замони шӯравӣ дар ин боғ макони бозии кӯдакон ва гулгашти ёдбуд ҳам буд».
ИЗОБРАЖЕНИЕ Қабри Ҷаббор Расулов
Бино ба иттилои манбаъ, сабаби даъват нашудани онҳо яқинан ба изҳороти норозиёнаи хешовандаон дар ВАО марбут аст.
«Фаҳмидам, ки ин ба касе дар боло хуш наомадааст, ҳарчанд ёвари президент Абдуҷаббор Раҳмон вақте моро дар Академияи илмҳо ҷамъ карда буд, ваъда дод, ки ҳангоми ба ҷойи дигар кӯчонидани ҷасадҳо моро даъват мекунад», – гуфт манбаъ.
ИЗОБРАЖЕНИЕ Қабри Бобоҷон Ғафуров
Ба гуфтаи манбаъ, касе аз намояндагони ҳокимият гуфтааст, вақте гӯрҳои наздикони моро мекофтаанд, муллоеро даъват кардаанд, ки дуо хондааст. «Ман ба ин шубҳа дорам, зеро ин кор хеле махфӣ анҷом дода шуд», – афзуд сарчашмаи хабар.
