Лоиҳаи азнавсозии «Боғи кӯдакон ва наврасон», ки дар наздикии варзишгоҳи «Сипар» (собиқ варзишгоҳи «Спартак») воқеъ аст, санаи 30 октябр ба раиси шаҳри Душанбе Рустами Эмомалӣ муаррифӣ шуд.
Бино ба маълумоти дафтари матбуоти шаҳрдории пойтахт, лоиҳа аз ҷониби ҶСК «Пажӯҳишгоҳи илмӣ тадқиқотӣ»-и САНИИОСП тарҳрезӣ гардидааст.
Гуфта мешавад, «Боғи Кӯдакон ва наврасон» дар масоҳати 2,5 гектар доман паҳн намуда, тибқи лоиҳа дар он гулгашту роҳравҳо, фаввораҳо ва нишастгоҳу нишасткурсиҳои сершумор бунёд карда мешаванд. Ҳамчунин, дар боғ амфитеатр бо 240 ҷойи нишаст, таваққуфгоҳи автомобилӣ, майдончаи варзишӣ ва нишастгоҳҳо барои бозии шоҳмот сохта мешаванд.
Баҳри дилхӯшии кӯдакон дар гӯшаҳои гуногуни боғ дастгоҳу лавозимоти бозиҳои кӯдакона насб гардида, дар як ҷониби он бо истифода аз буттаҳои ороишӣ лабиринт бунёд мегардад.
Рустами Эмомалӣ ба масъулон дастур дод, ки ҳангоми баргузор намудани корҳои кабудизоркунии боғ аз низоми муосир ва мукаммали обёрӣ истифода кунанд.
Ҳамчунин дастур дода шуд, ки зимни иҷрои корҳои ободониву кабудизоркунии боғ ба истифодаи масолеҳи хушсифати сохтмонӣ ва сатҳу сифати корҳо таваҷҷуҳи махсус зоҳир карда шавад.
Ғайр аз ин раиси пойтахт ба васлу насби низоми муосири равшанидиҳандаи боғ таваҷҷуҳ карда, дастур дод ки бояд баҳри сайругашт ва истироҳату фароғат дар боғ дар давоми рӯз, махсусан қисмати бегоҳии рӯз шароити мусоид муҳайё карда шавад ва тамоми иншооти санитариву гигиении он мутобиқ ба талабот бунёд гарданд.
