Ориф Хоҷазода, раиси Кумитаи давлатии идораи замин ва геодезии Тоҷикистон зимни нишасти матбуотӣ аз мансабдороне ном бурд, даст ба заминфурӯшӣ задаанд ва даъво кард, ки аксари онҳо аз вазифа барканор шудаанд.
“Қаҳрамонон”-и заминфурӯшӣ
Ба гуфтаи ӯ, дар 6 моҳи аввали соли равон нисбати 36 нафар кормандони ин ниҳод, аз ҷумла нисбати 24 корманди КВД “Бақайдгирии молу мулки ғайриманқул” ва 12 хидматчии давлатӣ барои содир намудани ҷиноят дар мавриди вайронкунии қонунгузории замин парвандаи ҷиноятӣ боз шуда, қариб ҳамаи онҳо аз вазифа озод карда шудаанд.
Ориф Хоҷазода дар ин робита номи раиси идараҳои кумитаи замин дар шаҳру ноҳияҳои Дӯстӣ, Носири Хисрав, Хуросон ва Панҷакент Авазалӣ Назарзода, Алихон Сафарзода, Бобокалон Маҳмадзиёд ва Ғолиб Муродзода ном бурд, ки дар шашмоҳаи аввали соли равон барои даст ба ҷиноят задан аз вазифа озод гардидаанд.
Инчунин, як муовини раиси Кумитаи идораи замини ноҳияи Ҷалолиддини Балхӣ бинобар сабаби даст задан ба ҷиноят аз вазифа барканор шудааст.
Раиси Кумитаи давлатии идораи замин ва геодезӣ дақиқ нагуфт, ки онҳо асосан ба кадом ҷиноят даст задаанд, вале кӯтоҳ тасдиқ кард, ки ҳамаи онҳо “қонунгузории заминро вайрон кардаанд”.
Дар ҳамин ҳол, як манбаи мо аз ин кумита ба шарти зикр нашудани номаш гуфт, ки ҳамаи онҳо “ба ҷиноятҳои коррупсионӣ ё заминфурӯшӣ” даст задаанд.
Ҷинояткорон дар рақамҳо
Ғайр аз ин, Ориф Хоҷазода оид ба ҷиноят ё “вайронкунии қонунгузории замин”, ки аз ҷониби кормандони зерсохтораш дар 4 соли охир рух додааст, иттилоъ дод.
Ба гуфтаи ӯ, аз соли 2020 то кунун теъдоди зерини кормандони зертобеи Кумитаи давлатии идораи замин ва геодезии Тоҷикистон ба ҷиноят ё “вайронкунии қонунгузории замин” даст зада, аз вазифа озод гардидаанд:
– 6 директори КВД “Бақайдгирии молу мулки ғайриманқул” дар манотиқ;
– 9 муовини директори КВД “Бақайдгирии молу мулки ғайриманқул” дар манотиқ;
– 10 бақайдгирандаи КВД “Бақайдгирии молу мулки ғайриманқул” дар манотиқ;
– 102 мутахассиси КВД “Бақайдгирии молу мулки ғайриманқул” дар манотиқ;
Инчунин, 54 хидматчии давлатӣ аз вазифаи ишғолкардаашон барои даст ба ҷиноят ё “вайронкунии қонунгузории замин” задан аз вазифа озод гардиданд:
– 19 раиси Идораи кумитаи идораи замин;
– 12 муовини раиси Идораи кумитаи замин;
– 23 сармутахассис ва мутахассиси Идораи кумитаи замин;
Ғайр аз ин, давоми як моҳи ахир 6 директори корхонаҳои бақайдгирӣ бинобар доғи судӣ доштан аз вазифа озод карда шудаанд.
“Кумита ҳар ҳафта бо ҳама кормандонаш тариқи онлайн машварати корӣ баргузор менамояд, ки мавзӯи асосиаш даст назадан ба ҳолатҳои коррупсионӣ ва ҷиноятӣ аст”, – гуфт Ориф Хоҷазода.
Чӣ миқдор замин ғайриқонунӣ истифода шуд?
Ориф Хоҷазода ҳамчунин дар бораи чӣ миқдор замин бо қонунвайронкунӣ ба қайд гирифта шудааст, иттилоъ дод.
Ба гуфтаи раис, дар 6 моҳи аввали соли равон 7 ҳазору 330 ҳолати вайронкунии қонунгузории замин (20 ҳазору 663 гектар) ошкор гардида, барои бартараф намудани ҳолатҳои ошкоргардида 6 ҳазору 588 дастур дода шудааст.
Нисбати 6 ҳазору 634 ҳолат парвандаҳои маъмурӣ тартиб дода шуда, ба маблағи 3 миллиону 992 ҳазору 371 сомонӣ қарорҳои ҷаримабандӣ қабул шудааст, ки аз ин 2 миллиону 936 ҳазору 487 сомонӣ (74%) ба суратҳисоби махсуси кумитаҳои идораи замин ворид гардидааст.
Барои додани баҳои ҳуқуқӣ 656 мавод ба додситонӣ ва 378 мавод барои ба таври маҷбури ситонидани маблағи ҷаримаҳо ба Хадамоти иҷро ирсол шуда, 5 ҳазору 188 ҳолати вайронкунии қонунгузории замин (ё 70%) (7 ҳазору 831 гектар) дар маҳал бартараф шудааст.
