Ҳукумати Ҷопон ба аввалин нишаст бо сарони давлатҳои 5 кишвари минтақаи Осиёи Марказӣ дар қолаби C5+1, ки рӯзҳои 19-20 декабр дар Токио баргузор мешавад, омодагӣ мегирад. Дар ин бора Вазорати корҳои хориҷии Ҷопон хабар медиҳад.
Дар ҷараёни кори нишаст сарони кишварҳо атрофи масоили мусоидат ба рушди мустақил ва устувори минтақа табодули назар намуда, рушди минбаъда ва таҳкими ҳамкориро баррасӣ хоҳанд кард. Дар доираи нишаст ҳамчунин форуми тиҷоратӣ баргузор мегардад.
Ғайр аз ин, вохӯриву гуфтушунидҳои дуҷонибаи сарвазири Ҷопон Санаэ Такаити бо сарони кишварҳои минатқа ба нақша гирифта шудааст.
Дар кори нишаст иштироки сарони давлатҳои Ӯзбекистон, Қазоқистон, Қирғизистон, Тоҷикистон ва Туркманистон дар назар аст. Хадамоти матбуоти президенти Қазоқистон дар бораи вохӯрии Қосим-Ҷомарт Токаев хабар дод. Дастгоҳҳои сарони боқимонда кишварҳои минтақа, аз ҷумла Тоҷикистон то ҳол иштироки онҳоро тасдиқ накардаанд.
Ҷопон ва кишварҳои Осиёи Марказӣ муддати ду даҳсола аллакай дар шакли муколамаи “Осиёи Марказӣ – Ҷопон” дар сатҳи вазирон ҳамкории мутақобила ба роҳ мондаанд. Нишасти қарибулвуқӯъ вохӯрии аввалини сарони ин кишварҳо маҳсуб меёбад.
ИЗОБРАЖЕНИЕ
Васоити ахбори умум зикр мекунанд, ки Санаэ Такаити нишастро ба сифати густариши ҳамкорӣ ва беҳбуди амнияти иқтисодӣ баррасӣ мекунад.
Баргузории нишасти “Осиёи Марказӣ – Ҷопон” моҳи августи соли 2024 дар Қазоқистон пешбинӣ шуда буд. Аммо бо сабаби эҳтимоли заминларзаи шадид дар Ҷопон пеш аз чорабинӣ ҳайати ин кишвар аз сафар даст кашид.
Қолаби C5+1 муколама байни 5 икшвари минтақаи Осиёи Мароказӣ (С5) ва 1 шарики хориҷӣ, дар ин мавриди Ҷопонро дар назар дорад. Чунин қолаб барои баррасии маҷмӯи васеи масоили ҳамкорӣ – аз соҳаи иқтисоду тиҷорат то амният ва рушди минтақавӣ истифода мешавад.
