Имрӯз, 25-уми декабр Эмомалӣ Раҳмон, раисҷумҳури кишвар “барои шиносоӣ бо ҷараёни корҳои созандагиву бунёдкорӣ, ифтитоҳи як зумра иншооти муҳим ва боздид аз хоҷагиҳои кишоварзӣ” ба минтақаи Бохтари вилояти Хатлон рафт.
Тибқи иттилои дафтари матбуоти раисҷумҳур ин сафар аз ноҳияи Ҷайҳун оғоз шуда, дар ин ноҳия нахуст корхонаи “Шири Ҷайҳун” ба кор оғоз кардааст.
Ин корхона аз ҷониби соҳибкор Наврӯз Комилов дар заминаи “Комбинати шири Душанбе” сохта шуда, дар он зиёда аз 10 намуди маҳсулоти ширӣ истеҳсол мешавад.
Ба иттилои манбаъ, корхона иқтидори коркарди 10 тонна маҳсулоти ширӣ дар як шабонарӯзро дошта, 50 нафар бо кор таъмин шудаанд.
Дар идома, Эмомалӣ Раҳмон бинои Кумитаи иҷроияи ҲХДТ дар ноҳияи Ҷайҳунро ба истифода додааст.
Ин бино аз ду ошёна иборат буда, барои кормандони он “шароити зарурӣ фароҳам оварда шудааст”.
Имрӯз, президент ҳамзамон, мактаби №53-и ноҳия Ҷайҳунро, ки барои 1 ҳазору 300 хонанда дар ду баст пешбинӣ шудааст, ифтитоҳ кард.
Ба иттилои расмӣ корҳои сохтмонии ин мактаб аз ҷониби “мутахассисон ва бинокорони Кооперативи тиҷоратии “Беҳбуд” бо истифода аз маҳсулоти хушсифати сохтмонӣ, риояи стандартҳои байналмилалӣ ва тарҳу унсурҳои зебои меъморӣ” анҷом дода шудааст.
Дар ҳаминҷо, ба таври восилавӣ 16 иншооти соҳаи маориф дар ноҳияҳои Ҷайҳун, Дӯстӣ, Панҷ, Қубодиён, Шаҳритус, Носири Хусрав ва 3 корхонаи саноатии дигар дар ноҳияҳои Дӯстӣ ва Панҷ ба таври фосилавӣ мавриди баҳрабардорӣ қарор гирифтанд.
Аз ҷумла дар ин ноҳияҳо чанд биноҳои нав ва иловагӣ бо 775 ҷой барои кӯдакистонҳо ва 6 ҳазору 200 ҷойи нишаст барои мактабҳо боз шудааст.
Инчунин, шуъбаи маорифи ноҳияи Дӯстӣ низ соҳиби бинои нави маъмурӣ гаштааст.
Корхонаи истеҳсоли шифер, корхонаи коркарди пахтаи “Сармояи Дӯстӣ” дар ноҳияи Дӯстӣ дар маҷмуъ бо 80 ҷойи корӣ, ва Парки технологӣ-инноватсионӣ дар ноҳияи Панҷ бо 50 ҷойи корӣ ифтитоҳ ёфтанд.
“Эмомалӣ Раҳмон иқдоми бунёдкоронаи соҳибкоронро шоистаи таҳсин хонда, ба масъулони корхонаҳои саноатӣ дастур доданд, ки ба сифати маҳсулот ва коркарди пахта таваҷҷуҳи ҷиддӣ зоҳир карда, дар оянда доираи фаъолияти корхонаҳоро васеъ ва ҷойҳои кориро зиёд намоянд”, – навиштааст дафтари расиҷумҳур.
Дар идома Эмомалӣ Раҳмон аз намоиши маҳсулоти кишоварзӣ, маҳсулоти консервашуда, полезӣ ва ғалладонагию лӯбиёгиҳо дар ноҳияи Ҷайҳун дидан кардааст.
Дар ноҳияи Ҷалолиддин Балхӣ сафари расиҷумҳур аз бозкушоии корхонаи орди ба номи Маҷид Ҳафизов шуруъ шуд.
Ин корхона аз ҷониби Корпоратсияи «Тоҷвар» бунёд шуда, тибқи иттилои расмӣ иқтидори истеҳсолии он дар як шабонарӯз то 200 тонна коркарди ғалларо ташкил медиҳад ва ғаллаи он аз Қазоқистон ворид мегардад. Дар ин корхона 150 нафар бо ҷйои кор таъмин гаштаанд.
Инчунин дар ин ноҳия, корхонаи Корхонаи макарони "Руми Паста", "бо 20 ҷойи корӣ ба кор шуруъ кард". Дар ин корхона се навъи маҳсулоти макаронӣ истеҳсол мешавад.
Дар идома Эмомалӣ Раҳмон ба шаҳри Бохтар рафт. Дар маркази вилояти Хатлон сафари раисҷумҳур бо ба истифодадиҳии кӯдакистони хусусӣ ва маркази инкишофи кӯдак шуруъ шуд.
Ба иттилои манбаъ кӯдакистони хусусӣ аз ҷониби соҳибкор Ҷамшед Назризода барои 240 тарбиятгиранда бунёд шудааст.
Дар ҳамин ҷо, ба таври фосилавӣ 7 муассисаи соҳаи маориф ба таври фосилавӣ ифтитоҳ ёфта, раисҷумҳури кишвар бо лоиҳаҳои бунёди 4 муассисаи соҳаи маориф ва 1 иншооти соҳаи варзиш шинос шуд.
Маркази ташхису табобати “Шифобахши Аср” давоми рӯ дар шаҳри Бохтар ба истифода дода шуд.
Ин иншооти тандурустӣ барои ташхису табобати бемориҳои дилу рагҳо, асаб, амрози даруна, амрози занона ва дигар намуди бемориҳо пешбинӣ шуда, 32 нафар бо ҷои кор дар он таъмин шудаанд.
Дар идома, дар кӯчаи Садриддин Айнии шаҳри Бохтар бинои баландошёнаи истиқоматии хайриявии Эҳсон мавриди баҳрабардорӣ қарор гирифт. Бинои нави 12 ошёна ва иборат аз 80 хона аз ҷониби соҳибкори ватанӣ Фатҳулло Соҳибов бунёд гардида.
Эмомалӣ Раҳмон ҳамзамон, бо 100 тан аз ғолибони озмунҳои ҷумҳуриявӣ, олимпиадаҳои фаннию байналмилалӣ ва ятимони кулл аз шаҳру ноҳияҳои вилояти Хатлон мулоқот карда, ба онҳо туҳфаҳо тақдим кардааст.
Дар шаҳри Бохтар дар доираи сафари раисҷумҳур, мактаби №17 барои 1 ҳазору 240 хонанда, бинои хобгоҳи донишҷӯёни Донишгоҳи давлатии Бохтар ба номи Носири Хусравр, бо 153 ҳуҷра барои 460 донишҷӯ ифтитоҳ шуд.
Бинои иловагии Коллеҷи тиббии инноватсионии шаҳри Бохтар низ дар ҷараёни сафари раисҷумҳури кишвар ба вилояти Хатлон кушода шуд. Ин бино аз ҷониби соҳибкор Қурбоналӣ Қаҳҳоров сохта шудааст.
Эмомалӣ Раҳмон дар идомаи сафари худ дар шаҳри Бохтар бинои нави маъмурӣ ва хобгоҳро дар қисми ҳарбии 3503-и Қӯшунҳои дохилии Вазорати корҳои дохилӣ мавриди истифода қарор дод.
Гуфта мешавад, бинои навбунёд бо назардошти меъёрҳои муосири меъморӣ ва талаботи махсуси соҳа бунёд гардидааст.
Бодя гуфт, ки дирӯз, 24-уми декабр дар шаҳри Душанбе бо иштироки Эмомалӣ Раҳмон, раисҷумҳури кишвар чанд бинову корхона ифтитоҳ шуда буд.
Аз ҷумла, бинои нави Телевизиони Душанбе, корхонаи маҳсулоти гӯштӣ ва ҳасибҳои “Покиза М”, марҳилаи дуюми “Кока-Кола Нӯшокиҳои Тоҷикистон” ифтитоҳ ёфт. Дар ҳамин рӯз биноҳои муассисаи давлатии Рекламаи берунӣ ва ороиши Душанбе ва майдони танкронии машқгоҳи Ҳарбмайдон 4 дидбонгоҳи сарҳадӣ дар марзи Тоҷикистону Афғонистон ба таври фосилавӣ мавриди истифода қарор дода шуд.
