Сергей Собянин, шаҳрдори Маскав гуфтааст, ки норасоии нерӯи корӣ дар ин шаҳри Русия ҳоло ба 400 то 500 ҳазор нафар мерасад ва пойтахти ин кишвар дар ояндаи наздик наметавонад аз ҷалби муҳоҷирони корӣ даст кашад.
Ӯ рӯзи 24-уми декабр дар гузориши солонааш ба Думаи давлатии Русия изҳор доштааст, ки дар солҳои оянда камбуди нерӯи кор дар пойтахти ин кишвар ба далели бӯҳрони демографӣ ва иқтисодӣ афзоиш хоҳад ёфт.
"Ин вазъият ҷалби нерӯи корӣ, аз ҷумла, ҷалби муҳоҷиронро ба як воқеияти раднопазир барои иқтисоди Маскав табдил медиҳад ва бино бар ин, "аввомгароӣ (популизм) дар соҳаи муҳоҷират ғайри қобили қабул аст",- гуфтааст шаҳрдори Маскав.
Дар ҳамин ҳол, ӯ гуфтааст, ки камбуди кадрҳо оянда ҳатто дар ҳолати суст шудани рушди иқтисод зиёдтар мешаванд.
Шаҳрдори Маскав ишора кардааст, ки сарфи назар аз душвориҳои мавҷуда, муҳоҷират ба рушди Маскав саҳаи назаррас дошта, то 5-6% маҷмӯи маҳсулоти дохилиро таъмин мекунад.
Ба таъкиди вай, коҳиши босуръати теъдоди муҳоҷирон метавонад ба болоравии сатҳи таваррум ва душвортар шудани мушкили камбуди кадрҳо дар соҳаҳои калидӣ бо шумули саноату соҳаи мудофиа оварда расонад.
Сергей Собянин илова кардааст, ки шаҳрдорӣ ният дорад, ки дар соҳаи муҳоҷират пай дар пай тартибот ҷорӣ карда, аз қарорҳои авомгароёна (популистӣ) даст кашад ва муҳиммияти ҳифзу нигаҳдории мусолиҳаи байни миллатҳо ва динҳоро таъмин кунад.
Қаблан, ӯ дар посух ба онҳое, ки аз ҳузури муҳоҷирон ва соҳибтахассусу забондон набуданашон шикоят мекунанд, тавсия дода буд, ки ба даст ҷорӯб гирифта, ба ҷои муҳоҷирон ба тоза кардани кӯчаҳои Маскав бароянд. Ӯ дар як барномаи телевизионӣ рӯзи 3-юми декабр афзудааст, “Худоро шукр, ҳастанд муҳоҷироне, ки чунин кори сахт ва ихтисоси пастро ба уҳда мегиранд”.
Эътирофи заҳмати муҳоҷирон аз сӯи шаҳрдори Маскав дар ҳолест, ки дар Русия рӯз то рӯз норасоии шадиди қувваи корӣ ба мушоҳида расида, мақомоти маҳаллӣ ҳарчи бештар маҳдудиятҳоро барои ҷалби муҳоҷиронро бозбинӣ мекунанд. Дар бахшҳои хӯроки умумӣ, кишоварзӣ, логистика ва хоҷагии манзилию коммуналӣ муҳоҷирони меҳнатӣ ба нерӯи ивазнашаванда табдил ёфтаанд. Зеро шаҳрвандони Русия намехоҳанд кори вазнин ва каммузд анҷом диҳанд.
Ин аст, ки вилоятҳо маҳдудиятҳое, ки қаблан барои муҳоҷирон дар кор дар соҳаҳои гуногун ҷорӣ карда буданд, оҳиста -оҳиста лағв ва эътироф мекунанд, ки бе муҳоҷирон иқтисоди ин кишвар пеш намеравад.
