Дар соли 2026 дар Русия талабот ва маҳдудиятҳое ҷорӣ мешаванд, ки ба муҳоҷирони корӣ ва корфармоҳои онҳо дахл доранд. Тасмим гирифтем, ки онҳоро бо забони содаву фаҳмо шарҳ диҳем.
Арзиши патент боло меравад
Арзиши патент дар аксарияти минтақаҳои Русия ҳамасола боло меравад ва ин ба индексатсия кардани нишондиҳандаҳои арзиши кор вобаста аст. Имсол патент чӣ гуна ва кай гарон мешаванд?
Патент барои муҳоҷирони корӣ дар Русия аз 1 январи соли 2026 гарон шуд.
Масалан, арзиши он дар шаҳри Маскав аз 8,9 ҳазор то 10 ҳазор рубл ва дар шаҳри Санкт-Петербург – аз 6 то 8 ҳазор рубл боло рафт.
Дар ин маводи мо доир ба дар куҷо ва то чӣ андоза боло рафтани рафтани арзиши патент барои муҳоҷирон маълумоти муфассал қобили дарёфт аст.
Шароитҳои дастрасӣ ба кумаки ройгони тиббӣ сангинтар шуд
Муҳлати фаъолияти қонунӣ дар Русия барои дарёфти полиси суғуртаи ҳатмии тиббӣ аз 3 то 5 сол тамдид шуд. Ин маънои онро дорад, ки дар муддати 5 соли аввали будубош муҳоҷирони корӣ метавонанд танҳо ба кумаки тиббии пулакӣ ё суғуртаи ихтиёрӣ умед банданд.
Кумаки ройгони тиббӣ тибқи суғуртаи ҳатмии тиббӣ танҳо дар ҳолатҳои фавқулода, вақте ки ба ҳаёт ва солимии шахс хатар таҳдид мекунад, метавонад расонида шавад.
Маҳдудият барои кор
Дар соли 2026 ба муҳоҷирон машғул шудан ба фурӯши машрубот ва тамоку дар ҳамаи минтақаҳои Русия ба истиснои шаҳри Маскав манъ шуд. Ҳамчунин фурӯши доруворӣ дар бозор ва нуқтаҳои фурӯши беруна низ манъ аст.
Дар дигар соҳаҳо дар мавриди теъдоди кормандони хориҷӣ маҳдудият ҷорӣ шуд. Дар соҳаи хидматрасонӣ ба мусофирон ва боркашонӣ ҳиссаи муҳоҷирон набояд аз 24% зиёдтар аз теъдоди умумии кормандон бошад. Дар бахши сохтмон меъёри нав ҷорӣ шуд – 50% ба ивази 80%-и пешина, дар соҳаи кишоварзӣ ва хоҷагии ҷангал – 40% ба ивази 50%-и пешина.
Агар дар ширкат ё корхона теъдоди хориҷиён аз шумори иҷозашуда зиёд бошад, ба корфармо лозим меояд, қисме аз кормандонро аз кор озод кунад, вагарна ҷарима мешавад.
Ғайр аз ин, барои ин моддаи нави аз кор озод кардан пешбинӣ мешавад. Аз 1 марти соли 2026 агар барои ширкат бо сабаби квотаҳо барои кормандони хориҷӣ, кам кардани теъдоди кормандон лозим ояд, корфармо метавонад муҳоҷирро аз кор озод кунад.
Маълумоти муфассал дар ин бора бо суроғаи зерин қобили дарёфт аст.
Назорат аз болои кӯдакони муҳоҷирон
Аз 28 январ низоми табодули маълумот дар бораи кӯдакони муҳоҷирон байни Вазорати корҳои дохилӣ ва мактабҳо мавриди амал қарор мегирад.
ВКД ба муассисҳои таълимӣ дар бораи дар қайди муҳоҷират қарор доштан ё хориҷ шудани шудани кӯдаки хориҷӣ маълумот пешниҳод мекунад.
Дар посух муассисаҳо доир ба муроҷиати волидон барои қабули кӯдак, ба мактаб қабул шудани ӯ барои таҳсил ва натиҷаи аз тести забони русӣ гузаштани кӯдаки муҳоҷир маълумот медиҳанд.
Чунин шуморида мешавад, ки ин ба мақомот ҷиҳати дақиқтар ба қайд гирифтани кӯдакони муҳоҷирон ва чӣ қадар дар кишвар иқомат доштан ва шумори аз таълим дар мактаб берун мондани онҳо имкон медиҳад.
Кадом тағйирот ҳоло муқаррар нашудааст, вале шояд оянда ҷорӣ шавад?
Аз соли равон Консепсияи сиёсати давлатии муҳоҷирати Русия барои солҳои 2026-2030 мавриди амал қарор мегирад. Дар ин ҳуҷҷат манъҳои мушаххас пешбинӣ нагардида, бештар вазифа ва ҳадафҳо барои 5 соли наздик муқаррар шудааст.
Аз Консепсияи мазкур чиро метавон интизорӣ дошт?
Рақамисозӣ бештар фаъол мешавад
Ба нақша гирифта шудааст, ки бунёди “Профил (симо)-и рақамии шаҳрванди хориҷӣ” ба охир расонида шавад. Ин пойгоҳи ягонаи электронии маълумот таҳти идораи ВКД буда, ҳамаи маълумот дар бораи шахс – аз биометрия то маълумот аз ruID-ро муттаҳид месозад.
Ҳамгироии бештар амиқ ба фарҳанги Русия
Айни замон барои дарёфти Иҷозатномаи зисти муваққатӣ (РВП), Ҳуҷҷати иҷозаи зист (ВНЖ), патент ё иҷозатнома барои кор, хориҷиён уҳдадоранд, ки донистани забони русӣ, таърих ва асосҳои қонунгузории Русияро тасдиқ кунанд.
Аммо мувофиқи Консепсияи нав, такя ба ҳамгироӣ боз бештар гардида, ба гумони ғолиб, дар ояндаи наздик талабот ба донистани забони русӣ ва таърих боз ҳам зиёдтар мешавад.
Афзалият ба ҷалби муташаккилона
Давлат ният дорад, ки корфармоёнро ба истифодаи интихоби ҳадафноки кормандон барои лоиҳаҳо ва корҳои мушаххас ҳавасманд созад. Ин бояд ба коҳиши вуруди хориҷиён ба бозори кори берун аз танзим мусоидат намояд.
