Дар пайи задухӯрдҳои ахир дар марзи Тоҷикистону Афғонистон, сафоратхонаҳои Чин дар ин ду кишвар аз чиниҳо хостаанд, ки аз сафар ба минтақаҳои наздимарзии Тоҷикистону Афғонистон худдорӣ кунанд.
Дар ин бора аз Сафорати Чин дар Душанбе ба “Азия-Плюс” имрӯз, 20-уми январ, хабар доданд.
“Ҷониби Чин ҳамеша амнияти ҳаёт ва саломатии шаҳрвандони худро дар хориҷ аз кишвар дар ҷойи аввал қарор медиҳад. Вақтҳои охир вазъият дар минтақаи марзии Тоҷикистону Афғонистон мураккабу ҳассос шудааст. Бо дарназардошти зарурати воқеии ҳифзи амнияти шаҳрвандони Чин дар Тоҷикистон, сафоратхонаҳои Чин дар Тоҷикистону Афғонистон аз шаҳрвандони Чин даъват карданд, ки аз сафар ба минтақаҳои марзӣ худдорӣ кунанд. Мо мутмаин ҳастем, ки вазъият дар марзи Тоҷикистону Афғонистон дар ниҳоят ба эътидол меояд”, – изҳор доштанд аз ин ниҳод.
Ёдрас мешавем, ки дар даргирии охир дар марзи Тоҷикистону Афғонистон, ки рӯзи 18-уми январ рух дод, 4 фарди мусаллаҳ кушта шуданд. Нерӯҳои марзбонии Тоҷикистон кушташудаҳоро “чаҳор террористӣ мусаллаҳ” хонда, гуфт, ин даргирӣ ва “амалиёти маҳви террористон” дар минтақаи марзии воқеъ дар ноҳияи Шамсиддин Шоҳин, ҳамсарҳад бо ноҳияи Хоҳони вилояти Бадахшони Афғонистон рух дод.
Дар ҳамин ҳол, Толибон афроди кушташударо гурӯҳи қочоқбарони маводи мухаддир гуфта, изҳор доштанд, ки ин қазияро таҳқиқ мекунанд.
Бояд зикр кард, ки ин аввалин даргирӣ дар сарҳади Тоҷикистон ва Афғонистон аст, ки дар соли 2026 расонаӣ мешавад.
ИЗОБРАЖЕНИЕ Бинои Сафорати Чин дар Душанбе
Соли гузашта дар сарҳади Тоҷикистон ва Афғонистон чанд даргирӣ рух дод, ки боиси кушта шудани чанд сокини осоишта ҳам шуд. Аз ҷумла, шаби 23-юми декабри соли 2025, дар минтақаи муҳофизатии дидбонгоҳи сарҳадии №5-и "Боғ", Отряди сарҳадии 0341 "Сарчашма”-и ноҳияи Шамсиддин Шоҳин "се аъзои гурӯҳи террористӣ", ки сарҳадро убур карда, ба Тоҷикистон гузаштанд, аз сӯйи мақомоти Тоҷикистон нобуд карда шуданд.
Пештар аз ин, дар пайи ду ҳамлаи дигар дар рӯзҳои 26 ва 30-юми ноябр аз Афғонистон ба ноҳияҳои наздимарзии Тоҷикистон 5 шаҳрвандони Чин кушта ва панҷ нафари дигар захмӣ шуданд. Ин ҳамлаҳо аввал ба бошишгоҳи як ширкати маъдантозакунӣ дар ноҳияи Шамсиддин Шоҳин ва баъдан ба як ширкати роҳсозӣ дар ноҳияи Дарвоз сурат гирифтанд.
Дар пайи ин Сафорати Чин дар Душанбе аз шаҳрвандонаш даъват карда буд, ки аз минтақаҳои наздимарзии Тоҷикистону Афғонистон берун шаванд.
ИЗОБРАЖЕНИЕ Бинои Сафорати Чин дар Кобул
Дертар Вазорати нақлиёти Тоҷикистон гуфт, корҳои сохтмонӣ дар қитаъи роҳи мошингарди Қалъаи Хумб – Ванҷ (то марзи ноҳияи Рӯшон), ки ҷузъе аз роҳи байналмилалии Душанбе-Қулма буда, дар пайи ҳамлаҳои мусаллаҳона аз хоки Афғонистон қатъ шуд, “то пурра барқарор шудани амният дар сарҳади Тоҷикистону Афғонистон барқарор намешаванд”.
Тоҷикистон ин ҳамлаҳоро шадидан маҳкум карда аз “Толибон” хоста буд, ки омилони онро дастгир кунанд. ВКХ-и ҳукумати Толибон гуфт, ки ҳамла тавассути гурӯҳҳое анҷом шудааст, ки ҳадафашон “эҷоди бесуботӣ ва беэътимодӣ миёни кишварҳои минтақа аст”.
Эмомалӣ Раҳмон, раисҷумҳури Тоҷикистон ин ҳамлаҳоро шадидан маҳкум карда, ба роҳбарони мақомоти қудратии кишвар дастур дод, ки "доир ба ҳалли масъала ва пешгирӣ аз такрори чунин ҳодисаҳои нохуш аз чораю тадбирҳои муассир кор бигиранд”.
Чанд рӯз баъди ин ҳодиса, Толибон аз боздошти ду гумонбар хабар дода, зикр карданд, ки онро тафтиш мекунанд. Аммо натиҷаи ин тафтиш то ҳол расонаӣ нашудааст.
