Мақомоти ҳифзи ҳуқуқи вилояти Хатлон бори аввал муноқишаи гурӯҳӣ дар шаҳри Кӯлобро, ки дар пайи он, Муҳаммадалӣ Саъдуллоев (Исуфов), размикори ҷавони тоҷик кушта шуда, чанд тани дигар ҷароҳат бардоштанд, шарҳ доданд. Ба иттилои онҳо, дар пайванд ба ин қазия, нисбати 6 иштирокчии ин занозанӣ парвандаи ҷиноӣ боз шуда, ду гумонбар боздошт шудаанд.
Дар пайи муноқишаи гурӯҳе аз наврасон дар шаби 11-уми январи соли равон дар Кӯлоб Муҳаммадалӣ Саъдуллоев (Исуфов), размикори ҷавони тоҷик кушта ва ба гуфтаи манбаъҳо, ду тани дигар захмӣ шудаанд. Қаблан гуфта мешуд, ки дар пайванд ба ин ҳодиса, Сулаймон Одинаев, як сокини 19-солаи ин шаҳр ҳамчун гумонбар боздошт шудааст.
Шариф Назарзода, сардори Раёсати корҳои дохилӣ (РВКД) дар вилояти Хатлон баъди қариб ду ҳафтаи ин муноқиша бо сокинони шаҳри Кӯлоб вохӯрда, аз онҳо хостааст, ки барои пешгирӣ аз кордкашии наврасон бо мақомоти интизомӣ ҳамкорӣ кунанд.
ИЗОБРАЖЕНИЕ Шариф Назарзода
Ин мулоқот дирӯз, 22-юми январ, бо иштироки устодони варзишу ҷавонони шаҳри Кӯлоб баргузор ва дар он, ҳамчунин, масъалаи кордкашии наврасон, зиёдшавии сатҳи ҷиноят ва пайвастан ба гурӯҳҳои террористӣ баррасӣ шудааст.
Сардори Раёсати ВКД дар ҳамоиш акси размикори кушташуда, захмишудаҳо ва боздоштшудаҳоро дар ин муноқиша ба ҷавонони Кӯлоб намоиш дода, "якчанд далелҳои изтиробангезро таҳлил ва пешниҳоди ширкаткунандаҳо кардааст".
“Алайҳи 6 нафар парвандаи ҷиноӣ боз шуда, ду кас дар боздоштанд”
Аз Раёсати ВКД дар вилояти Хатлон ба “Азия-Плюс” бархе аз ҷузъиёти занозании шаби 11-уми январро гуфтанд.
Тавре аз ин ниҳод гуфтанд, муноқиша бо иштироки 7 ҷавони ин шаҳр дар пайи баҳс сари телефони мобилӣ сар задааст, ки дар натиҷа як тан кушта шуда, 4 нафари дигар захмӣ шудаанд.
“Нисбати 6 нафар иштирокчиёни муноқишаи гурӯҳӣ дар шаҳри Кӯлоб парвандаи ҷиноятӣ оғоз шудааст. Гумонбари асосӣ, Сулаймон Одинаев, сокини 19-солаи маҳаллаи Нурободи шаҳри Кӯлоб ва Маҳмуд Набиев, иштирокчии дигари ин муноқиша, рафиқи Одинаев дар боздошт қарор доранд. Чор нафари дигаре, ки алайҳашон парвандаи ҷиноӣ оғоз шудааст, дар муноқиша захм бардоштаанд ва дар беморхона қарор доранд”,-гуфтанд аз ин Раёсат.
“4 тан захмӣ шуданд”
Мақомот аз яке аз захмиён Саидраҳмон Раҳмон, сокини 18-солаи шаҳри Кӯлоб ном бурданд, ки ҷароҳати вазнин бардошта, ҳоло вазъи саломатиаш нисбатан беҳтар шудааст.
ИЗОБРАЖЕНИЕ
Вазъи саломатии Амирҷон Одинаев, Муҳаммадҷони Зайниддин ва Сунатулло Умарзода, се захмии дигар хуб будааст. Ҳоло ин чор нафар дар беморхона қарор доранд ва ба қавли мақомот, баъди итмоми тафтишоти пешакӣ “онҳо барои кирдори кардаашон назди қонун ҷавоб мегӯянд”.
Аз Раёсат гуфтанд, алайҳи Сулаймон Одинаев, бо иттиҳоми қасдан расонидани зарари вазнин ба саломатӣ, дар ҷараёни бетартибиҳои оммавӣ (моддаи 110, қисми 3-и Кодекси ҷиноятӣ) парванда ифтитоҳ шудааст. Бар асоси ин банди қонунгузорӣ ба гумонбар аз 8 то 12 соли зиндон ҷазо таҳдид мекунад.
Нисбати Маҳмуд Набиев, ки дар боздошт аст, бо иттиҳоми авбошӣ (моддаи 237) парвандаи ҷиноятӣ боз шудааст. Ин банди қонунгузорӣ аз 5 то 7 соли зиндонро пешбинӣ мекунад.
Нисбат ба 4 иштирокчии дигари муноқиша, ки дар беморхона қарор доранд, низ бо гумони авбошӣ (моддаи 237, қисми 2 ва 3 –и КҶ) парвандаи ҷиноятӣ оғоз шудааст. Ин банди қонунгузорӣ аз ҷарима то 7 соли зиндонро пешбинӣ мекунад.
.jpg)
ИЗОБРАЖЕНИЕ Муҳаммадалӣ Саъдуллоев (Исуфов
Муноқиша чаро сар задааст?
Қаблан, манобеи алоҳида гуфта буданд, ки дар пайи муноқиша ду ҳамроҳи размикор, яке аз шикам ва дигаре аз даст захм бардошта, бо вазъи сиҳатии “миёна” дар бемористон қарор доранд. Он замон гуфта мешуд, ки дар пайванд ба ин ҳодиса, танҳо Сулаймон Одинаев боздошт шуда, бар асоси ду банди Кодекси ҷиноӣ – “расонидани зарари вазнин ба саломатӣ, ки боиси ҳалокати инсон мешавад” ва “авбошӣ” нисбаташ парванда боз шудааст.
Хабаргузории Радиои Озодӣ бо такя ба манобеи хуб навишта буд, ки “баҳс аз як телефони мобилӣ сар шуда, гӯё Маҳмадалӣ Юсупов телефони мобилии Сулаймон Одинаевро барои ба ҷое занг задан гирифта, бозпас надодааст”.
Як манбаъ аз бахши кор бо ҷавонони шаҳри Кӯлоб низ имрӯз, 23-юми январ, ба “Азия-Плюс” ин гуфтаҳоро тасдиқ карда гуфт, ки размикор телефони мобилии Одинаевро гирифта, бозпас надодааст, ки ба баҳси ду ҷониб кашида шудааст.
“Маблағ талаб кардаанд, пул додааст, аммо телефонро барнагардонидааст. Баҳс сари телефон оғоз шуда бо кордкашӣ анҷом ёфтааст”,-гуфт манбаъ.
Муҳаммадалӣ Саъдуллоев (Исуфов) рӯзи 12-уми январ ба хок супорида шуд.
Бояд гуфт, куштори размикори тоҷик дар шабакаҳои иҷтимоӣ вокуниши тунди ҷомеаро ба бор овард, ки бештари корбарон сатҳи ҷинояткорӣ миёни наврасону ҷавононро ба беназоратии онҳо аз сӯйи волидайнашон рабт доданд.
Ҷузъиёти бештари ин қазияро дар матлаби мо дар ин пайванд мутолиа кунед.
Зимнан, аз омори сатҳи ҷинояткорӣ дар шаҳри Кӯлоб, ки дар мулоқоти 22-юми январ Шариф Назарзода пешниҳод шуд, дида мешавад, ки тайи панҷсолаи охир сатҳи ҷинояткорӣ дар шаҳри Кӯлоб, нисбат ба дигар шаҳру ноҳияҳои вилояти Хатлон афзудааст.
Тибқи иттилои расмӣ, давоми соли 2025-ум дар ин шаҳр 719 ҷиноят содир шудааст, ки ин нишондиҳанда нисбат ба панҷ соли пеш қариб 90 ҳолат зиёд аст. Дар вилояти Хатлон соли гузашта 6 ҳазору 621 ҷиноят ошкор шудааст, ки нисбат ба соли 2024-ум 173 ҷиноят (6 ҳазору 648) зиёд аст.
