Ҳукумати Тоҷикистон дар бораи сарфу харҷи буҷети давлатӣ дар соли 2026 қарор қабул кард. Ин санад ба истифодаи пурсамари маблағҳои давлатӣ, саривақт амалисозии лоиҳаҳои сармоягузорӣ ва мусоидат ба рушди иқтисод дар соли 2026 равона шудааст.
Дар он аз ҷумла гуфта мешавад, ки вазорату идораҳо ва ҳукуматҳои шаҳру навоҳӣ вазифадоранд, ки иҷрои саривақтии муқаррароти буҷетро, бахусус дар қисмати пардохтҳои иҷтимоӣ ва музди меҳнати кормандони мақомоти давлатӣ ва ташкилотҳои буҷетӣ таъмин кунанд. Ҳамчунин, риояи нақшаи харидҳои давлатӣ ва хароҷоти самараноки маблағҳо ба сохтмон ва таъмиру навсозии иншоот муҳим аст.
Дар санад зикр мешавад, ки бо мақсади баланд бардоштани шаффофият, Вазорати молия хароҷоти маблағҳо аз буҷетро назорат карда, ҳисоботҳои семоҳа тартиб медиҳад. Ҳамаи харидҳои давлатӣ бояд дар доираи меъёрҳои тасдиқгардида бо самти ҳатмии сарфашуда дар суратҳисобҳои махсус амалӣ шаванд.
"Дар робита ба пардохти музди меҳнат тариқи кортҳои электронӣ, инчунин пешниҳоди ҳатмии ҳисобот дар бораи пардохти нафақа ва кумакпулиҳои иҷтимоӣ тадбирҳо андешида шудааст", – гуфта мешавад дар санад.
Ҳамчунин, дар ҳуҷҷат, ба масъалаи анҷоми саривақтии лоиҳаҳои давлатии сармоягузорӣ таваҷҷуҳи хосса зоҳир шуда, зикр мешавад, ки "баҳри амалисозии лоиҳаҳо вазорату идораҳо ва мақомоти маҳаллии ҳокимияти давлатӣ бояд дар бораи тақсимоти грантҳо ва маблағҳои қарз маълумоти муфассал пешниҳод кунанд".
Дар қарор уҳддадориҳо оид пешниҳоди ҳисоботи семоҳа дар бораи хароҷот ва даромад ба буҷети ҷумҳуриявӣ бо шумули маълумот доир ба амалиёти молиявӣ, андоз ва дигар пардохтҳои ҳатмӣ зикр шудааст.
Ҷорисозии гардиши электронии ҳуҷҷатҳо барои соддаву осон кардани амалиёти молиявӣ ва баланд бардоштани шаффофияти онҳо як таркиби муҳими қарор маҳсуб меёбад. Тавре дар санад бармеояд, мақомоти маҳаллии ҳокимияти давлатӣ уҳдадоранд, ки саривақт воридсозии маълумот ба низоми идоракунии молияи давлатиро таъмин кунанд.
"Ҳукумат ҳамчунин ҷиҳати баланд бардоштани фарҳанги андозсупорӣ, инчунин барои ҳамоҳангсозӣ бо созмонҳои байнулмилалии молиявӣ ҷиҳати таъмини маблағгузории барномаҳои давлатӣ тадбирҳо пешбинӣ кардааст", – зикр мешавад дар қарори ҳукумат.
Назорати иҷрои қарори мазкур ба дӯши Қоҳир Расулзода, сарвазири Тоҷикистон вогузор шудааст.
Ёдрас мекунем, ки қисмати даромади буҷети соли 2026 ба маблағи зиёда аз 65 млрд сомонӣ (ҳудуди 7 млрд доллар) муайян карда шудааст, ки 31% зиёдтар нисбат ба соли 2025 аст. Ҳаҷми умумии хароҷоти ҳамёни асосии кишвар дар соли 2026 ҳудуди 67 млрд сомонӣ (7,2 млрд доллар) муқаррар шудааст.
Дар соли 2026 ҳаҷми ҳадди ниҳоии касри умумии буҷети давлатии 1% нисбат ба Маҷмӯи маҳсулоти дохилӣ (ММД) муқаррар шудааст, ки ба ҳудуди 2 млрд сомонӣ баробар аст.
Бино ба маълумоти пешакии Вазорати молияи Тоҷикистон, қисмати даромади буҷети давлатӣ дар соли 2025 ба андозаи 13,3% барзиёд иҷро гардида, зиёда аз 60,3 млрд сомонӣ маблағ ворид карда шудааст.
