Эмомалӣ Раҳмон, раисҷумҳури Тоҷикистон имрӯз, 23-юми май, бо Содир Ҷабборов, ҳамтои қирғизистонии худ тариқи телефон гуфтугӯ кардааст.
Сомонаи раисҷумҳури Тоҷикистон навишт, ки ҷонибҳо раванди муносибатҳои ду кишварро мусбат арзёбӣ карда, ба аҳаммияти идомаи татбиқи мувофиқаҳои байнидавлатие, ки қаблан ҳосил шудаанд, таваҷҷуҳ зоҳир кардаанд.
Дар идомаи суҳбат раҳбарони ду кишвар мулоқотҳои ояндааи худ ва омодагӣ ба ҳамоиши ҷашнии Созмони ҳамкории Шонгҳойро, ки рӯзҳои 31-уми август ва 1-уми сентябр дар шаҳри Бишкек баргузор мешавад, муҳокима кардаанд.
Раисҷумҳури ду кишвар, ҳамчунин, дар бораи “масъалаҳои алоҳидаи рӯзномаи байналмилалӣ ва минтақавӣ мубодилаи афкор анҷом доданд”.
Ёдовар бояд шуд, ки ҳафтаи ҷорӣ, аз 18 то 21-уми май дар Қирғизистон Рӯзҳои фарҳанги Тоҷикистон баргузор шуд, ки дар он намояндагони соҳаҳои фарҳанг, санъат, адабиёт ва синамои тоҷик иштирок карданд. Ин аввалин рӯзҳои фарҳанги Тоҷикистон дар Қирғизистон пас аз ҳалли баҳсҳои марзӣ буд, ки ба иттилои нашршуда, ҳадафи он таҳкими муносибатҳои дӯстона, густариши ҳамкориҳои эҷодӣ ва табодули таҷриба миёни аҳли фарҳанги ду кишвар гуфта шуд.
