Қамчибек Тошиев, раиси пешини Кумитаи давлатии амнияти миллӣ (КДАМ)-и Қирғизистон хабари ифтитоҳи парвандаи ҷиноӣ алайҳашро шаҳр додааст.
Дирӯз, 28-уми апрел, Қамчибек Тошиев ҳамроҳи Нурланбек Тургунбек, раиси пешини Жогорку Кенеш (порлумони Қирғизистон) ва Қурманқул Зулушев, собиқ вакили парлумон ба Сарраёсати тафтишотии Вазорати корҳои дохилии Қирғизистон барои бозпурсӣ даъват шуда, пас аз чанд соат бинои ин ниҳодро тарк кардаанд.
Баъди ин Откурбек Раҳмонов, директори шабакаи “Регион ТВ” ва яке аз шахсони наздик ба Тошиев дар саҳифаи фейсбукаш аз номи раиси пешини КДАМ навишт, ки нисбат ба ӯ парвандаи ҷиноӣ боз кардаанд, вале бегуноҳ аст.
Тошиев гуфтааст, ки ба адолати додгоҳӣ бовар дорад, ки танҳо “гунаҳкорро ҷазо медиҳанд ва бегуноҳро сафед мекунанд”.
“Ман тамоми имкониятро дорам, ки пурра худамро дар ин парванда ҳимоя кунам ва агар Худо кумак кунад, ман аз ҳама иттиҳомот сафед хоҳам шуд”, – гуфтааст Тошиев.
Мақомоти Қирғизистон расман шарҳ надодаанд, ки онҳо барои чӣ ва дар доираи кадом парванда ба бозпурсӣ даъват шуданд.
Аммо баъзе расонаҳо бо такя ба иттилои нашркардаи вакили дифо Шердор Абдикапаров навиштанд, ки “эҳтимол аст алайҳи Тошиев ва ду вакили пешин бо иттиҳоми “кӯшиши табаддулоти давлатӣ” парванда боз шудааст”.
Баъдтар ин вакили дифоъ навиштааш дар фейсбукро пок кардааст ва ба “Кактус-медиа” шарҳ додааст, ки “расман иттиҳоме эълон нашудааст ва сиёсатмадорони собиқ дар робита ба парвандае, ки мумкин аст чунин иттиҳомот эълон шуда бошад, ба бозпурсӣ даъват шудаанд”.
Дар идома ин расона аз қавли манобеи худ навиштааст, ки “бозпурсии онҳо ба парвандаи маъруф ба “Номаи 75” марбут аст”.
Бояд гуфт, 9-уми феврали соли 2026 75 нафар дар мактуби кушода ба Содир Ҷабборов, раисҷумҳури Қирғизистон ва Нурланбек Тургунбек, раиси пешини Жогорку Кенеш дархост карданд, ки пеш аз муҳлат интихоботи президентӣ баргузор карда шавад. Пас аз ин Содир Ҷабборов Қамчибек Тошиевро аз вазифаи муовини Девони вазирон – раиси КДАМ-и Қирғизистон барканор ва дар баробари ин як қатор мансабдорони наздик ба ӯро низ сабукдӯш кард.
Баъдан Нурланбек Тургунбек аз мансаби раиси порлумони Қирғизистон истеъфо дод ва аз ваколати вакилии худ даст кашид.
Содир Ҷабборов, раисҷумҳури Қирғизистон дар мусоҳиба бо хабаргузории “Кактус-медиа”, ки 27-уми апрел нашр шуд, дар бораи даст доштани Қамчибек Тошиев дар парванда маъруф ба “Номаи 75” изҳор доштааст, ки тафтишот ва додгоҳ муайян мекунад, ки оё ӯ даст дорад ё не.
“Қарори ниҳоӣ дар бораи он ки кӣ гунаҳкор аст ва кӣ бегуноҳ аст, аз ҷониби додгоҳ қабул карда мешавад”, – гуфтааст Ҷабборов.
Ӯ ба саволи хабарнигор бо ишора ба дӯстиаш бо Қамчибек Тошиев ва эҳтимоли “сабукӣ” ба ӯ таъкид кардааст, ки “ин тавр нахоҳад шуд”.
Дар бораи сабабҳои эҳтимолии “сардӣ” миёни “ду дӯст” – Ҷабборов ва Тошиев, ки аввали соли ҷорӣ на танҳо Қирғизистон, балки минтақаро ба ҳайрат овард, дар матлаби мо “Фурӯпошии қудрати мувозӣ дар Қирғизистон” мутолиа кунед.
