Тоҷикистон ва Қазоқистон имзои Харитаи роҳ оид ба фаъолсозии ҳамкорӣ дар бахши кишоварзиро дар нимаи дуюми соли 2026 ба нақша гирифтаанд.
Дар ин бора зимни вохӯрии вазирони кишоварзии Тоҷикистон Қурбон Ҳакимзода ва Қазоқистон – Айдарбек Сапаров, ки дар Душанбе дар доираи Конфронси 35-уми минтақавиии Созмони озуқаворӣ ва кишоварзии СММ (ФАО) доир гардид, изҳори назар шуд.
Зимни вохӯрӣ дурнамои густариши ҳамкории мутақобила дар бахши кишоварзӣ, масоили амнияти озуқаворӣ, рушди робитаҳои тиҷоратӣ ва иқтисодӣ, инчунин роҳандозии лоиҳаҳои муштарак дар ин соҳа мавриди баррасӣ қарор гирифт.
Ба гуфтаи Айдарбек Сапаров, савдои дуҷонибаи маҳсулоти кишоварзӣ байни кишварҳо дар ҳоли рушди устувор қарор дорад. Аз рӯйи натиҷаҳои соли 2025 ҳаҷми гардиши мол дар соҳаи кишоварзӣ ба андозаи 11,5% афзуда, ба 595 млн доллар расид ва дар соли 2026 низ тамоюли мусбат ба мушоҳида мерасад: дар семоҳаи аввал ҳаҷми савдои дуҷониба 26,1% афзуда, 182 млн долларро ташкил дод.
Асоси маҳсулоти содиротӣ аз Қазоқистонро орду гандум, равғани растанӣ, ҷуворимакка, маҳсулоти гӯштӣ ва дигар молҳо ташкил медиҳанд.
Ҷониби Қазоқистон ба тавсеъаи ҳамкорӣ дар соҳаи сармоягузорӣ ва таъсиси корхонаҳои муштарак манфиатдорӣ изҳор намуд. Аз ҷумла, ин ҷо сари лоиҳаҳо дар соҳаи истеҳсоли орд, коркарди маҳсулоти чорводорӣ, истеҳсоли маснуоти қаннодӣ, равғани растанӣ, шарбатҳои табиӣ ва консентратҳо дар қаламрави Қазоқистон бо ҷалби сармоягузорӣ аз Тоҷикистон сухан меравад.
“Табодули мунтазами маълумот дар бораи чорабиниҳо дар соҳаи кишоварзӣ, фаъолсозии ҳамкорӣ дар соҳаи селексия ва тухмикорӣ, инчунин таҳкими шарикӣ дар соҳаи илмҳои кишоварзӣ бо шумули табодули донишу таҷриба ва технологияҳоро пешниҳод мекунем. Амалисозии ташаббусҳои муштарак ба таъмини амнияти озуқавории кишварҳоямон ва густариши содироти маҳсулоти кишоварзӣ мусоидат хоҳад кард”, – зикр кард вазири кишоварзии кишвари ҳамсоя.
Дар навбати худ, вазири кишоварзии ҷумҳурӣ Қурбон Ҳакимзода манфиатдории Тоҷикистонро дар густариши шарикӣ бо Қазоқистон тасдиқ кард. Ӯ имконоти зиёди ҳамкориҳоро дар соҳаҳои савдо, коркради маҳсулоти кишоварзӣ, улуми кишоварзӣ ва ҷорисозии технологияҳои муосир зикр кард.
Дар чаҳорчӯби конфронси ФАО Айдарбек Сапаров дар муколамаи вазирон бахшида ба мавзӯи сармоягузорӣ низ суханронӣ карда, таъкид дошт, ки Қазоқистон дар низоми ҷаҳонии амнияти ғизойӣ мавқеи муҳими стратегӣ дошта, ба сафи кишварҳои истеҳсолкунандагони бузурги зироати ғалладона дохил мешавад.
Бино ба маълумоти ҷониби Қазоқистон, сол 2025 дар кишвар пайдарпай ду сол ҳудуди 27 млн тонна зироати ғалладона ҷамъоварӣ шуд. Ғайр аз ин, қариб 5 млн тонна равған аз тухмиҳо ва ҳудуди 1 млн тонна зироати лӯбиёдона истеҳсол шудааст. Дар соли гузашта Қазоқистон 15,3 млн тонна зироати ғалладона содир кардааст.
Сапаров зикр кард, ки Қазоқистон ба таҳкими мақоми яке аз марказҳои ғизойӣ будани худ дар АвруОсиё ва таъмини таҳвили устувори зироати ғалладона ва маҳсулоти коркарди он ба кишварҳои Осиёи Маказӣ, Ховари Миёна, Аврупо ва дигар минтақаҳои ҷаҳон омода аст. Аз рӯйи натиҷаҳои вохӯрӣ Тоҷикистон ва Қазоқистон омодагии худро ба таҳкими минбаъдаи шарикӣ ва амалисозии лоиҳаҳои муштарак дар соҳаи кишоварзӣ тасдиқ карданд.
