Азия-Плюс - 30 сол!
2 апрели соли 2026 аз таъсиси Гурӯҳи расонаҳои “Азия-Плюс” 30 сол пур шуд!
Давоми ин солҳо мо бо таҳияи хабару мусоҳибаву матолиби таҳлилӣ ва гузоришҳои ҷолибу мустақим ҳамеша бо Ватан будем. Аз пешрафту ободиаш гуфтему бар хушрӯзиву дастовардаш зам кардем ва ин ҳамаро ба таври ҷолибу хонданӣ ба мухотаби худ расонидем. Дар рӯзҳои душвор паҳлӯяш будем ва бо таҳияи матолиби таҳлилӣ роҳҳал ҷустему аз ояндаи беҳтаре мужда додем.
Барои рушди ҷомеаи шаҳрвандӣ, пешрафти тиҷорат мусоидат ва муваффақияти ҳамватанонро муаррифӣ кардем. Ва ин ҳамаро бо гузоришу қиссаҳои ҷолиб аз ҳар гӯшаи Тоҷикистон пешкаши мухотаби худ кардем.
Талош кардем Тоҷикистонро ба ҷомеаи ҷаҳон шоиста муаррифӣ ва аз манофеи он ҳимоят кунем. Ва ин ҳама барои рушди кишвар ва бо пуштибонии Шумо – хонандаву бинандаву шунавандагони гиромӣ буд.
Минбаъд низ мо ба ин роҳи худ идома хоҳем дод ва эътимод дорем, ки Шумо ҳам моро ҳамроҳ хоҳед буд.
Шиори мо дар ҷашни 30-юмин солгард: “Ояндаро бо ҳам хоҳем сохт!”
Дар ин тарҳи хос дар бораи таърихи “Азия-Плюс” – таърихи муштараки худ хоҳем гуфт.
