Гурӯҳи расонаҳои “Азия-Плюс” ба муносибати 30-солагии фаъолияти худ аз номи вазири саноат ва технологияҳои нави Тоҷикистон Шералӣ Кабир табрикнома дарёфт кард. Ӯ дар ин таҳнияташ гуфтааст, ки “Азия-Плюс” дар тӯли солҳои фаъолияташ худро ҳамчун яке аз нашрияҳои бонуфуз ва серхонандатарин дар Тоҷикистон муаррифӣ кардааст.
“Дар тӯли се даҳсола “Азия-Плюс” роҳи пуршараферо аз як нашрияи хурди чопӣ то як медиахолдинги бонуфузи бисёрплатформавӣ, ки берун аз марзҳои кишварамон низ маъруф аст, тай кард”, – навиштааст вазири тоҷик.
Шералӣ Кабир таъкид кардааст, ки “имрӯз “Азия-Плюс” садои ҷомеаи шаҳрвандӣ, оинаи даврон ва манбаи боэътимоди иттилоот барои миллионҳо хонанда дар Тоҷикистон ва хориҷ аз он мебошад”.
Вазорати саноат ва технологияҳои нав саҳми идораи нашрияро дар инъикоси масъалаҳои рушди технологӣ, рақамисозӣ ва рушди саноати кишвар баланд арзёбӣ кардааст: “Журналистикаи воқеъбин ва касбии шумо ба ташаккули ҷомеаи иттилоотӣ ва тарғиби навовариҳо дар байни омма мусоидат мекунад”.
Ӯ дар табрикномааш “ба тамоми ҳайати кормандони гурӯҳи расонаҳо саломатии бардам, илҳоми эҷодӣ, зафарҳои нави касбӣ” таманно карда, таъкид доштааст, ки “бигзор “Азия-Плюс” минбаъд низ ҳамчун пули боэътимод миёни давлат ва ҷомеа, миёни гузашта ва ояндаи Тоҷикистони бузурги мо боқӣ монад”.
Ёдовар мешавем, ки 2-юми апрел соли 1996 аввалин варақаи иттилоотӣ – таҳлилии “Азия-Плюс” ба наш расид. Нашри ин варақаи иттилоотӣ таҳлилӣ, ба ташаккули Гурӯҳи расонаҳои “Азия-Плюс” оғоз бахшид.
Он имрӯз ҳафтанома, радио ва оҷонсии иттилоотиро муттаҳид мекунад ва барои миллионҳо мухотаби худ бо се забон – забони давлатӣ, яъне тоҷикӣ, русӣ ва англисӣ мӯҳтавои босифат ва боэътимод таҳияву пешниҳод менамояд.
