Дар Тоҷикистон Шӯро оид ба рушди иқтисоди рақамии назди президенти Тоҷикистон таъсис дода шуд. Қарори дахлдор дар ин хусус дар портали иттилооти ҳуқуқии Вазорати адлияи ҷумҳурӣ нашр шудааст.
Санади мазкур рӯзи 23 майи соли 2026 қабул шудааст.
Мувофиқи муқаррарот дар бораи Шӯро, ин ниҳод мақоми доимоамалкунандаи машваратию маслиҳатӣ дар назди президенти Тоҷикистон мешавад. Онро сарвари давлат роҳбарӣ карда, вазифаи муовини раиси Шӯро ба уҳдаи муовини аввали сарвазири кишвар вогузор мегардад.
Ба ҳайати Шӯро муовини роҳбари Дастгоҳи иҷрояи президент, вазирони адлия, рушди иқтисод ва савдо, молия, раиси Кумитаи давлатии сармоягузорӣ ва идораи амволи давлатӣ, сардори Маркази технологияҳои иттилоотӣ ва коммуникатсионии Дастгоҳи иҷроияи президент шомил мешаванд.
Директори Агентии инноватсияҳо ва технологияҳои рақамии кишвар ба ҳайси котиби Шӯро кор мекунад.
Шӯро бо мақсади амалисозии сиёсати давлатӣ дар соҳаи рақамисозӣ таъсис дода мешавад. Он ҳамчунин масоили рушди иқтисоди рақамиро баррасӣ намуда, доир ба рушди ин самт тавсия ва пешниҳодҳо таҳия мекунад.
Ғайр аз ин мақоми нав бояд ҳамкориии мутақобилаи мақомоти давлатӣ, ташкилоту корхона ва бахши хусусиро таъмин кунад.
Муайян кардани самтҳои афзалиятноки сиёсати давлатӣ дар соҳаи иқтисоди рақамӣ ва таҳияи пешниҳодҳо оид ба рушди он дар Тоҷикистон аз ҷумла вазифаҳои асосии Шӯро номбар шудааст.
Ҳамчунин Шӯро ба роҳандозии муколама байни давлат ва бахши хусусӣ оид ба масоили пешбурд ва рушди иқтисоли рақамӣ машғул хоҳад шуд.
Баргузори таҳқиқот ва таҳлил оид ба масоили иқтисоди рақамӣ, дастгирии лоиҳаҳои инноватсионӣ, рушди зерсохтори рақамӣ, баланд бардоштани саводнокии рақамӣ ва ҷорисозии технологияҳои муосир аз вазифаҳои муҳими Шӯро дониста мешаванд.
Қаблан дар Тоҷикистон Барномаи миёнамуҳлати рушди иқтисоди рақамӣ дар Ҷумҳурии Тоҷикистон барои солҳои 2026-2030 тасдиқ шуд. Ғайр аз ин солҳои 2025-2030 дар кишвар Солҳои рушди иқтисоди рақамӣ ва ва инноватсияҳо эълон шудааст.
