Ба 8,4 дарсад афзоиши иқтисоди Тоҷикистон дар соли гузашта, рушди фаъоли саноат ва фазоиши талаботи дохилӣ мусоидат кардааст. Дар ин бора дар гузориши навбатии Бонки авруосиёии рушд (БАОР) зикр шудааст.
Дар гузориши макроиқтисодии БАОР, ки дирӯз, 2-юми феврал нашр шуд, зикр мешавад, ки истеҳсол дар соҳаи саноат 22,1% афзуда, ҳиссаи бештар ба истихроҷи канданиҳои фоиданок рост меояд, ки 36,2% зиёд шудааст.
Ҳамчунин, истеҳсол дар бахши саноати коркард 10,5% ва соҳаи энергетика 15% афзоиш ёфтааст.
"Дар рушди иқтисодӣ, талаботи дохилӣ (хароҷоти пулии сокинон ва тиҷорат дар дохили кишвар) нақши муҳим бозид. Дар ин бора якбора ду нишондиҳанда гувоҳӣ медиҳанд: фурӯши чакана 14,4% ва сармоягузорӣ – 23% афзудааст", зикр мешавад дар санад.
Таҳлилгарони БАОР, афзоиши талаботи дохилиро мустақиман ба афзоши даромади аҳолӣ нисбат медиҳанд: дар моҳҳои январ-ноябри соли 2025 музди меҳнати воқеӣ дар муқоиса бо ҳамин давраи соли 2024 ба андозаи 15,6% зиёд шудааст.
Ғайр аз ин, дар гузориш зикр мешавад, ки дар моҳҳои яенвар-сентябри соли гузашта интиқоли маблағ аз ҷониби муҳоҷирони корӣ 50% зиёд шудааст.
Тибқи пешгӯии БАОР, ҷараёни баланди рушди Маҷмӯи маҳсулоти дохилӣ (ММД) дар соли 2026 низ боқӣ мемонад: дар сатҳи 8,1% дар назар аст.
Қобили зикр аст, ки иқтисоди Тоҷикистон тибқи маълумоти расмӣ, пас аз сустшавии рушд дар соли пандемияи 2020 (то 4,5%), тайи панҷ соли ахир бино ба маълумоти расмӣ, дар ҳоли рушд қарор дорад.
Бино ба маълумоти Бонки ҷаҳонӣ, соли 2024 ҳаҷми маблағи интиқолгардида ба ҷумҳурӣ 5,8 млрд долларро ташкил дод. Ҳаҷми маблағи интиқолёфта аз ҷониби муҳоҷирон ба 45,4% нисбат ба ММД-и соли гузаштаи Тоҷикистон баробар буданд, ки баландтарин нишондиҳанда дар ҷаҳон дар ифодаи нисбӣ мебошад.
Қобили зикр аст, ки аз соли 2013 мақомоти Тоҷикистон аз пешниҳоди ҳама гуна маълумот ба расонаҳо дар бораи ҳаҷми интиқоли маблағ ба ҷумҳурӣ худдорӣ мекунанд, ҳарчанд дар қонунгузории кишвар он ба маълумоти махфӣ мансуб нест.