Пас аз ворид намудани тағйироту иловаҳо ба Кодекси ҷиноятии Тоҷикистон дар соли гузашта, ҳолатҳои истифодаи ғайриқонунии нерӯи барқ дар кишвар тадриҷан кам шуд. Дар ин бора мудири кулли ҶСК “Барқи тоҷик” Маҳмадумар Асозода зимни нишасти матбуотии рӯзи 3-юми феврал дар Душанбе хабар дод.
Ӯ зикр кард, ки дар доираи тағйироти воридгардида аз ҷониби ҳукумат ситоде таъсис ёфта, ки ба таври доимӣ амал карда, ба пешгирии ҳолатҳои истифодаи ғайримақсаднок ва ғайриқонунии барқ дар саросари кишвар машғул аст.
Ба гуфтаи Асозода, ин имкон дод, ки пули барқи истифодашуда дар дохили кишвар 1,6 млрд сомонӣ (ҳудуди 170 млн доллар) зиёд ҷамъоварӣ шавад.
“Қисме аз ин, ба маблағи 900 млн сомонӣ, барои пардохти қарзи ширкат равона карда шуд”, – илова намуд ӯ.
ИЗОБРАЖЕНИЕ Маҳмадумар Асозода
Асозода дар идома изҳор дошт, ки соли 2025 қарзи ширкат ба миқдори 2,6 млрд сомонӣ (тақрибан 280 млн доллар) – аз ҳудуди 24, 2 млрд сомонӣ дар аввали сол то 21,6 млрд сомонӣ (ҳудуди 2,3 млрд доллар) коҳиш ёфт.
Қобили зикр аст, ки қарзи мазкур аз ҳисоби пардохт нашудани маблағи истифодаи барқи гирифтаи ширкат аз истеҳсолкунандагони дохилӣ – ҶСК “НБО Сангтӯда-1”, ҶСК “НБО Сангтӯда-2”, ҶСК “НБО Роғун”, инчунин қарзҳои ҷалбшудаи хориҷӣ барои татбиқи лоиҳаҳои сармоягузорӣ дар соҳаи электроэнергетика ба вуҷуд омада буд.
Ёдрас мекунем, ки моҳи апрели соли 2025 ба Кодекси ҷинояти Тоҷикистон ва Кодекс дар бораи ҳуқуқвайронкунии маъмурии Тоҷикистон тағйирот ворид карда шуд, ки дар онҳо барои истифодаи ғайримақсаднок ва ғайриқонунии нерӯи барқ масъулият (ҷавобгарӣ) пешбинӣ мешавад. Ин тағйирот бо мақсади коҳиши талафот дар шабакаҳои барқ ва баланд бардоштани интизом миёни истеъмолгарон қабул шуданд.