Оҷонсии ҳавошиносии Тоҷикистон сокинони кишварро аз бориши барфу борон ва эҳтимоли фаромадани тарма дар рӯзҳои 10 то 14-уми феврал ҳушдор додааст. Ин ниҳод гуфтааст, ки дар ин рӯзҳо дар ноҳияҳои кӯҳиву доманакӯҳӣ ва ағбаҳо бориши барфу борони пуршиддат пешгӯйӣ мешавад.
Дар пайи ин, ба гуфтаи манбаъ, дар шоҳроҳҳои кӯҳӣ эҳтимол ҳаракати мошинҳо душвор шуда, дурии биниш кам гардад.
Ҳамчунин, дар рӯзҳои мазкур дар минтақаҳои тармафарои шоҳроҳи мошингарди Душанбе –Чаноқ (километрҳои 48–74), минтақаҳои Майхура, Зидеҳи ноҳияи Варзоб, ноҳияҳои кӯҳии тобеи ҷумҳурӣ ва ноҳияҳои ғарбии ВМКБ хатари фаромадани тарма вуҷуд дорад.
Мақомот ба далели бад шудани вазъи ҳаво ба шаҳрвандон тавсия додаанд, ки бе зарурат ба минтақаҳои кӯҳӣ ва тармафаро сафар накунанд.