Соли 2025 аз 3 як ҳиссаи ҷинояткорони таҳти пайгард боздошт шудаанд, аз ҷумла қисме аз онҳо дар кишварҳои Иттиҳоди давлатҳои мустақил дастгир ва ба Тоҷикистон оварда шудаанд. Дар ин бора Бахтиёр Назарзода, сардори Раёсати кофтукови ҷиноятии Вазорати корҳои дохилии Тоҷикистон зимни нишасти хабарӣ иттилоъ дод.
Ба гуфтаи ӯ, соли гузашта беш аз 6 ҳазору 700 ҷинояткор дар ҷустуҷӯ карор доштаанд. Дар умум, аз ин теъдод беш аз 2 ҳазор 600 тан дастгир шуданд.
“Аз шумори ҷинояткорони дар ҷустуҷӯ қарордошта бо ҳамкориҳои мутақобилан судманди мақомоти ҳифзи ҳуқуқи хориҷи кишвар 835 нафар дар хориҷи кишвар дастгир карда ва ба ҷумҳурӣ оварда шудаанд”, – гуфт Назарзода.
Сардори Раёсати кофтукови ҷиноятӣ афзуд, ки аксари ҷинояткорони дар ҷустуҷӯ қарордошта дар кишварҳои Иттиҳоди давлатҳои мустақил дастгир шудаанд.
Вай бо пурсиши такрорӣ гуфт, ки аксари онҳо дар Русияву Қазоқистон боздошт шудаанд. Ба қавли ӯ, инчунин, боздошту ба Ватан овардашудаҳо аз давлатҳои Аврупо низ ҳастанд.
Аммо Бахтиёр Назарзода омори мушаххаси аз кадом давлатҳо кадом ҷинояткорон кай дастгиру ба ватан оварда шударо ироа накард.
Чанде пеш, Владимир Колоколтсев, вазири корҳои дохилии Русия зимни сафараш ба Душанбе бо ҳамтои тоҷикаш Рамазон Раҳимзода мулоқот карда, дар он дидор гуфта буд, ки мақомоти интизомии Русия давоми 8 моҳи соли 2025-ум 400 зодаи Тоҷикистонро, ки дар пайгарди Вазорати корҳои дохилии Тоҷикистон буданд, боздошт кардаанд.
Аз ин пештар, ба гуфтаи Колоколтсев, соли 2024-ум 260 ҷинояткори дар ҷустуҷӯ қарордошта дар Русия боздошту ба Тоҷикистон оварда шуда буданд.
