Мувофиқи амри президенти Тоҷикистон Эмомалӣ Раҳмон ба Вазорати молияи ҷумҳурӣ супориш дода шудааст, ки аз ҳисоби фонди захиравии сарвари давлат ба Кумитаи кор бо ҷавонон ва варзиши назди ҳукумати ҶТ барои қадрдонии 67 нафар ғолибон ва ҷоизадорони мусобиқаҳои байналмилалии варзишӣ ва мураббиёни онҳ 2,04 млн сомонӣ маблағ ҷудо кунад.
Ба иттилои хадамоти матбуоти сарвари давлат, 67 варзишгар аз рӯйи 8 намуди варзиш, аз ҷумла гӯштини ҷудо, гӯштини тарзи озод, гӯштини юнонӣ-румӣ, бокс, қаиқронӣ, таэквандо (ВТ), самбо ва кикбоксинг бо ҷоиза сарфароз гардонида мешаванд. Барои як варзишгар вобаста ба натиҷаи варзишӣ то 150 ҳазор сомонӣ пешбинӣ гардидааст.
“Таъсиси ҷоизаи президенти Тоҷикистон ба ғолибон ва ҷоизадорони мусобиқаҳои байналмилалии варзишӣ нишонаи қадршиносии давлатии варзишгарони бонангу номуси кишвар мебошад, ки дар арсаи ҷаҳонӣ барои ҳифзи обрӯи миллат ва баланд бардоштани мақоми давлат заҳмат мекашанд”, – омадааст дар хабари хадамоти матбуоти президент.
Дар хабар ҳамчунин зикр мешавад, ки ҷоизаи мазкур соли панҷум аст, ки зери сарпарастии сарвари давлат тақдим гардида, дар ин давра ба хазинаи варзишии кишвар 510 медал, аз ҷумла 140 тилло, 166 нуқра ва 204 биринҷӣ ворид шудааст.