Тоҷикистон аз рӯйи ҳаҷми Маҷмӯи маҳсулои дохилӣ (ММД)-и номиналӣ тайи се сол аст, ки пайдарпай дар зинаи охир миёни кишварҳои Осиёи Марказӣ қарор дорад.
Бино ба маълумоти мақомоти омори кишвраҳои минтақа (маълумоти ХБА дар мавриди Туркманистон), ММД Қазоқистон дар соли 2025 бори нахуст аз 300 млрд доллар зиёд шуд.
Дар идома Ӯзбекистон қарор дорад, ки ММД-и номиналии ин кишвар дар соли гузашта 152,5 млрд долларро ташкил дод.
Дар зинаи баъдӣ Туркманистон ҷойгир шудааст, ки ММД-и номиналиаш ба 72,1 млрд доллар баробар аст.
Мавқеъҳои охирро Қирғизистон (22,6 млрд доллар) ва Тоҷикистон (19 млрд доллар) касб кардаанд.
Дар ҳамин ҳол, тайи соли охир рушди аз ҳама зиёди воқеии ММД маҳз дар ҳамин кишварҳо ба қайд гирифта шудааст: дар Қирғизистон 11,1% ва Тоҷикистон – 8,4%.
Соли 2025 рушди вооқеии иқтисоди Ӯзбекистон – 7,7%, Қазоқистон – 6,5% ва Туркманистон – 2,3%-ро ташкил медиҳад.
Қобили зикр аст, ки то соли 2023 иқтисоди Тоҷикистон боло аз Қирғизистон буд, аммо тайи се соли охир ин мавқеъро аз даст дод.
Тибқи арзёбии Хазинаи байнулмилалии асъор, соли 2025 Тоҷикистон аз лиҳози ҳаҷми ММД ба ҳар сари аҳолӣ низ дар зинаи охир қарор гирифт. Ин маънои онро дорад, ки дар фазои пасошӯравӣ низ Тоҷикистон дар охир аст, зеро Осиёи Марказӣ минтақаи бештар қафомонда аз лиҳози иқтисод байни кишварҳои собиқи Иттиҳоди Шӯравӣ (СССР) маҳсуб меёбад:
– Қазоқистон – 14,7 ҳаз. доллар
– Туркманистон – 10,8 ҳаз. доллар
– Ӯзбекистон – 3,7 ҳаз доллар
– Қирғизистон – 2,8 ҳаз доллар
– Тоҷикистон – 1,6 ҳаз. доллар
Таҳлилгарони Forbes зикр мекунанд, ки Маҷмӯи маҳсулоти дохилӣ (ММД) ншондиҳандаи калидӣ барои арзёбии миқёси иқтисоди кишварҳо шуморида мешавад.
Равиши маъмулии баҳодиҳӣ ба ММД-и кишвар аз усули хароҷот иборат аст, ки дар он нишондиҳандаи умумӣ бо роҳи ҷамъбасти хароҷот ба маҳсулоти нави истеъмолӣ, сармоягузориҳои нав, хароҷоти давлатӣ ва арзиши софи содирот ҳисоб мешавад.
Дар нашрия доир ба даҳ иқтисоди бузургтарини ҷаҳон дар соли 2025 маълумот дода шудааст.
