Ҳайатҳои Эрон ва Амрико даври навбатии музокирот бар сари барномаи ҳастаии Ҷумҳурии исломиро баргузор карданд. Гуфтушунид рӯзи 26-уми феврал дар Женева бо раҳбарии Аббос Ароқчӣ, вазири корҳои хориҷии Эрон ва Стив Уиткофф, фиристодаи махсуси Амрико дар умури Ховари Миёна ва Ҷаред Кушнер, соҳибкори амрикоӣ гузашт.
Ин даври гуфтугӯҳо, ба навиштаи расонаҳо, ғайримустақим ва бо миёнҷигарии Бадр Бусаидӣ, вазири корҳои хориҷии Уммон сурат гирифта, Рафаэл Гроссӣ, мудири Оҷонсии байналмилалии нерӯи ҳастаӣ низ ба он пайвастааст.
Хабаргузории Axios навиштааст, ки ҷонибҳо дар ду давр, субҳ ва шом гуфтушунид кардаанд. Манбаъ гуфтааст, пас аз мулоқоти субҳ, Уиткофф ва Кушнер “норозигӣ” нишон доданд. Вале пас аз нишасти шом, як мақоми олии амрикоӣ ба нашрия афзудааст, ки гуфтушуниди тарафҳо “мусбат” гузаштааст. Вай тафсилот надодааст.
Аббос Ароқчӣ пас аз анҷоми музокирот дар нигоштае дар саҳифаи “Х”-и худ даври сеюми музокирот бо Амрикоро “фишурдатарин марҳила то кунун” арзёбӣ карда, гуфтааст, ки “гуфтӯгуҳо бо ин фаҳмиш ба поён расид, ки дар бораи мавзӯъҳои асосӣ барои ҳар гуна созиш, аз ҷумла бекор кардани таҳримҳо ва қадамҳои марбут ба соҳаи ҳастаӣ, ба таври ҷузъитар ва дақиқтар ба ройзаниҳо идома диҳем”.
Вазири корҳои хориҷии Уммон аз “пешрафти назаррасе” дар музокироти Эрон ва Амрико хабар дода, дар саҳифаи “Х”-и худ навиштааст, ки гуфтугӯҳои Эрон ва Амрико “пас аз машваратҳо дар пойтахтҳо”-и ду кишвар аз сар гирифта мешаванд.
Ҳамчунин, вазири корҳои хориҷии Эрон дар суҳбат бо расонаҳо изҳор дошт, ки “пешрафти хубе” дар музокирот бо Амрико доштаанд ва ин “яке аз ҷиддитарину беҳтарин музокирот”-и тарафҳо будааст.
“Мо вориди баррасии ҷиддии унсурҳои як созишнома шудем – чӣ дар соҳаи ҳастаӣ ва чӣ дар мавриди таҳримҳо. Дар бораи баъзе масъалаҳо тафоҳумҳо хеле наздик шудааст. Албатта, ҳанӯз баъзе ихтилофи назарҳо вуҷуд доранд, ки ин табиист, аммо нисбат ба гузашта, ҷиддият бештаре дар ҳар ду ҷониб барои расидан ба як роҳҳалли музокирашуда мушоҳида мешавад”, – илова кардааст Ароқчӣ.
Ба гуфтаи ӯ, аз рӯзи душанбе, 2-юми март, дастаҳои фаннии эрониву амрикоӣ дар шаҳри Венаи Утриш баррасиҳои коршиносии фанниро оғоз мекунанд, “то баъзе масъалаҳои фаннӣ дар чаҳорчӯби мушаххас танзим ва сипас бо талабот ва мулоҳизаҳои сиёсии ду тараф мутобиқ карда шаванд”.
Ароқчӣ афзудааст, ки даври баъдии музокироти Эрон ва Амрико дар тӯли як ҳафтаи оянда сурат хоҳад гирифт.
Амрикоиҳо дар ин маврид то кунун изҳори назари расмӣ накардаанд.
Теҳрон ва Вашнигтон дар масъалаи барномаи ҳастаии Эрон дар заминаи шиддат гирифтани муносибатҳои ду кишвар гуфтушунид мекунанд. Axios менависад, ки бисёре аз мақомҳои маъмурияти Доналд Трамп, президенти ИМА гуфтушунидҳои Женеваро ҳамчун охирин имконият барои дипломатия медонанд, пеш аз он ки Трамп тасмим гирад, ки ба Эрон ҳамла мекунад ё не.
