Бархе соҳибкорон дар сардиҳои зимистон “антифриз”-и пастсифатро ба фурӯш гузоштаанд, ки онро “Тоҷикстандарт" ошкор кардааст. Дар ин хусус Темурҷон Абдулваҳобзода, сардори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон имрӯз, 3-юми феврал, дар нишасти матбуотӣ иттилоъ дод.
Ба гуфтаи ӯ, соли равон кормандони Агентӣ 310 литр “антифриз”-ро ошкор кардаанд, ки ҳамчун маҳсулоти дорои тамғаи баландтар фурӯхта мешуд, аммо дар асл он пастсифат будааст. Соли гузашта то замони ҷорӣ шудани мораторий ба санҷиши соҳибкорон 485 литр “антифриз”-и пастсифат ошкор карда шуда буд.
“Ҳанӯз ҳам соҳибкороне ҳастанд, ки маҳсулоти мавриди таваҷҷӯҳро қалбакӣ карда, маҳсулоте истеҳсол мекунанд, ки шаклаш ба ҳам монанд аст, вале ба сифат ва таркиби он аҳамият намедиҳад. Тадбирҳои эҳтиётӣ ва санҷишҳои лабораторӣ нишон доданд, ки дар баъзеи онҳо ба ҷуз об ва моддаи рангкунанда чизе нест. Дар ҳоле ки антифриз танҳо аз об, спиртҳои дуатомаи этиленгликол ва моддаҳои рангкунанда иборат аст",- гуфт ӯ.
Сардори “Тоҷикстандарт” ёдовар шуд, ки истифодаи ин моеъҳо дар фасли зимистон ба мошинҳо осеб мерасонад.
Дар робита ба ин, Агентӣ ҳушдор медиҳад: ҳангоми харидани ин маҳсулот шумо бояд аз фурӯшанда сертификати мутобиқатро пурсед.
Ба иттилои “Тоҷикстандарт”, дар натиҷаи санҷиши намунаҳои маводи сӯзишворӣ, ки вориди Тоҷикистон мешаванд, ҳолатҳои фурӯши сӯзишворӣ бо тамғаи дигар низ ошкор шудааст, ҳарчанд дар асл ин маҳсулот ба сифати эълоншуда ҷавобгӯ набуд.
