Odob.tj сомонаи Шӯрои ВАО-и Ҷумҳурии Тоҷикистон фаъол шуд. Дар ин бора ба Хабаргузории “Азия-Плюс” раиси Шӯрои ВАО-и ҶТ Қироншоҳ Шарифзода хабар дод.
Ин сомона фаъолияти Шӯрои ВАО-и тоҷикро нишон дода, дар он шикояти мардум аз болои журналистон ва назари коршиносон дар бораи нигоштаҳои журналистӣ аз назари меъёрҳои ахлоқи журналистӣ баҳо дода мешаванд.
Раиси Шӯрои ВАО Қироншоҳ Шарифзода зимни сӯҳбат қайд кард, ки сомонаи Odob.tj ба хотири мусоидат дар татбиқи “Меъёрҳои ахлоқии журналистӣ дар ҶТ” ва инъикоси фаъолияти ниҳоди танзимгари он -Шӯрои ВАО-и ҶТ таъсис ёфтааст. Дар баробари ин кӯшиш ба харҷ дода мешавад, ки вобаста ба масъалаҳои мубрами вазъи озодии сухан ва рушди журналистикаи миллӣ, хабару гузоришҳо пахш гарданд.
Мавсуф зикр кард, ки ҷомеаи журналистӣ сомонаи мазкурро ба ҳайси майдони ибрози ақида, фикру мулоҳизот ва табодули назар оид ба масоили касбӣ истифода мекунанд.
“Ҳоло ки Шӯрои ВАО дар ҳамдастӣ бо Дафтари САҲА дар Душанбе ба татбиқи лоиҳаи “Меъёрҳои ахлоқӣ” пардохтааст ва дар доираи он матолиби ВАО-и чопӣ ва электрониро дар заминаи риояи меъёрҳои ахлоқии фаъолияти журналистӣ мавриди таҳлилу баррасӣ қарор доданист. Огоҳӣ аз мавқеъ ва вокуниши ҳамкасбон ва аҳли ҷомеа тавассути гушаи “Тамос бо мо”-и сомона бароямон хеле муҳим аст”.
Шӯрои ВАО-и ҶТ январи соли 2010 таъсис шудааст. Муассисони ин шӯро бонуфузтарин ташкилоти журналистии кишвар чун Иттифоқи журналистони Тоҷикистон, “Азия-Плюс”, ТВ “СМТ”, ҶДММ “Чархи гардун”, АМВАОМТ ва дигарон мебошанд.
