Игор Ангеловски, мутахассиси 49-сола аз Мақдуния (Македония)-и Шимолӣ сармураббии нави тими миллии Тоҷикистон таъйин шуд. Дар ин бора Федератсияи футболи кишвар иттилоъ дода, гуфтааст, ӯ дастаро ба қисми ниҳоии Ҷоми Осиё-2027, ки дар Арабистони Саудӣ баргузор мешавад, омода мекунад.
Ангеловски пештар дастаи мунтахаби Мақдунияи Шимолиро роҳбарӣ карда, ин тимро дар соли 2020 бори аввал ба мусобиқаи қаҳрамонии Аврупо баровардааст. Пас аз ин ӯ аз кор рафт: дастаи ӯ ҳамаи 3 бозиро бо таносуби тӯбҳои 2:8 бохт.
Дар сатҳи дастаҳо ин мураббӣ ҳамроҳ бо “Работнички” дар мавсими 2013/14 қаҳрамони Мақдунияи Шимолӣ шуда, ду маротиба Ҷоми ин кишварро (2013/14 ва 2014/15) ба даст овардааст. Ӯ ҳамчунин, дар дастаҳои “Горитса”-и Крувосӣ (Хорватия), “Каспий”-и Қазоқистон ва “Этникос Ахнас”-и Қибрис (Кипр) кор кардааст.
Бо сармурабии пешинаи тими миллии Тоҷикистон мутахассиси Сербистон Горан Стеванович ҳарчанд даста вазифаи асосии марҳилаи интихобиро иҷро карда, ба даври финалии Ҷоми Осиё-2027 роҳ ёфта бошад ҳам, муҳлати қарордод дигар тамдид нашуд.
Қарордод бо мутахассиси Сербистон маҳз то охири марҳилаи интихобӣ пешбинӣ шуда буд. Дар натиҷа ҳамкории мунтахаби Тоҷикистон бо Стеванович ғайриинтизор қатъ шуд. Ҷонибҳо сари идомаи ҳамкорӣ ба мувофиқа расида натавонистанд. Ва яке аз омилҳои асосии он масоили молиявӣ гуфта мешавад.
Тибқи маълумоти мавҷуда, музди меҳнати моҳонаи Стеванович ҳудуди 20 ҳазор долларро ташкил медод, ки ин маоши сармураббӣ баландтарин дар таърихи мунтахаби Тоҷикистон маҳсуб меёбад.
Таҳти сарварии ӯ мунтахаби Тоҷикистон чор бозӣ гузаронида, дар 3-тоаш пирӯзӣ шуд ва 1 бозиро мусовӣ кард. Маҳз мусовӣ дар бозӣ муқобили Филиппин (1:1) натиҷаи ҳалкунанда гардида, ба Тоҷикистон имкон дод, ки дар гурӯҳ ҷойи аввалро касб кунад ва ба даври финалии мусобиқаи Ҷоми Осиё-2027 роҳ ёбад.
