Мунтахаби футболи наврасони Тоҷикистон (U-17) дар вохӯрии аввали мусобиқаи Ҷоми Осиё дар Арабистони Саудӣ бар дастаи Тайиланд бо ҳисоби 2:0 дастболо шуд.
Футболбозони тоҷик таҳти роҳбарии Далер Қаёсов аз дақиқаҳои аввали вохӯрӣ дилпурона бозиро оғоз карданд. Аллакай дар дақиқаи якум ҳисоб кушода шуд: пас аз партоби Муҳаммадҷон Мираҳмадов ҳимоятгари дастаи ҳариф аз беэҳтиётӣ тӯбро ба дарвозаи худ ворид намуд.
Тайиланд дар навбати худ эҳтиёткорона бозӣ карда, кӯшиш мекард, ки ҳамлаҳои ҷавобӣ анҷом диҳад, вале лаҳзаҳои хатарнок ба вуҷуд оварда натавониста, комёб нашуд.
Дар қисми дуюм низ бозӣ зери назорати фтболбозони тоҷик қарор дошт. Парвиз Бобоназаров, Парвиз Раҳимзода ва боз якчанд бозигарони тими Тоҷикистон аз лаҳзаҳои хуби голзанӣ истифода бурда натавонистанд.
Лаҳзаи аз ҳама хатарноктарин назди дарвозаи Тоҷикистон дар дақиқаи 57-ум ба вуҷуд омад, вале пас аз зарбаи футболбози ҳариф тӯб ба болочӯби дарвоза бархӯрда, аз майдон берун рафт.
Дар бозии дигари гурӯҳи “А” Арабистони Саудӣ бо натиҷаи 4:0 Мянмарро ноком кард. Пас аз анҷоми даври аввал Тоҷикистон ва Арабистони Саудӣ бо 3 имтиёзӣ мутаносибан дар зинаҳои дуюм ва якум қарор доранд.
Дар даври дуюми марҳилаи гурӯҳӣ миллипӯшони навраси тоҷик рӯзи 9-уми май бо ҳамтоёнашон аз Мянмар ва рӯзи 12 май бо Арабистони Саудӣ дидор анҷом медиҳанд. Ин бозӣ метавонад калидӣ шавад ва дар сурати пирӯзӣ, роҳ ёфтани тими Тоҷикистон ба даври минбаъдаи мусобиқа (плей-офф) қариб таъмин гардида, дастаро ба ҳадафи асосӣ – роҳхат гирифтан ба мусобиқоти қаҳрамонии ҷаҳон наздик мекунад.
