Мунтахаби муштзанони Тоҷикистон дар марҳилаи якуми Ҷоми ҷаҳон, ки аз 18 то 27-уми апрел таҳти сарпарастии “World Boxing” дар Бразилия баргузор мешавад, иштирок мекунад.
Дар ин мусобиқот, 4 варзишгар дар вазнҳои гуногун ширкат мекунанд:
- Меҳроҷ Сӯфиҷонов (55 кг);
- Дамир Муйбалихонов (60 кг);
- Муродҷон Ашӯралиев (70 кг);
- Рамоил Қурбонов (80 кг).
Дастаро мураббӣ, Асомиддин Бурҳонов роҳбарӣ мекунад.
Мусобиқа ба силсилаи се марҳилаи Ҷоми ҷаҳон шомил аст. Баъди марҳила дар Бразилия, мусобиқаҳои силсила дар Чин идома ёфта, сипас 8 муштзани беҳтарин дар ҳар як вазн ба марҳилаи финалӣ моҳи ноябр дар Тошканд роҳхат мегиранд. Маҳз дар пойтахти Ӯзбекистон боксчиёни беҳтарин дар силсилаи нави ҷаҳонӣ муайян карда мешаванд.
Низоми радабандӣ дар мусобиқа аҳамияти хосса дорад. Аз рӯи натиҷаҳои ҳамаи се силсила радабандии ҷаҳонии муштзанон таҳия шуда, тавре ки интизорӣ меравад, нишондиҳандаи муҳимтарини интихоб ба Бозиҳои олимпии соли 2028 мешавад. Ҳамин тариқ, ҳар як ҳунарнамоӣ дар мусобиқаи Ҷоми ҷаҳон мустақиман ба ояндаи варзишгарон таъсир мерасонад.
