Дар пайи танишҳо дар Ховари Миёна, Русия 632 кормандашро аз Эрон хориҷ кардааст, ки дар миёни онҳо 27 шаҳрванди Тоҷикистон ҳам будааст. Ҳамаи онҳо дар нерӯгоҳи ҳастаии “Бушаҳр” кор мекардаанд.
Дар ин бора хабаргузории “РИА Новости” бо такя ба Андрей Жилтсов, консули Русия дар Исфаҳони Эрон хабар дод. Мақомоти Тоҷикистон дар ин маврид изҳори назар накардаанд.
Ба гуфтаи манбаъ, ин коргарон бо 4 парвози махсус ба Русия бозгардонида шудаанд. Ба ҷуз шаҳрвандони Русияву Тоҷикистон, дар миёни онҳо шаҳрвандони кишварҳои дигар, аз ҷумла, Белорус, Арманистон, Ӯзбекистон ва Қазоқистон низ қарор доштаанд.
Хабаргузории давлатии ТАСС қаблан навишта буд, ки дар нерӯгоҳи мазкур 20 корманди дигари Русия боқӣ мемонанд, аз ҷумла, “мудири шуъбаи мо, муовинони ӯ, нерӯҳои амниятӣ, коргарони таъмир ва нигоҳдорӣ, ки барои бехатарии таҷҳизот масъуланд”. Маълум нест, ки дар миёни онҳо шаҳрвандони Тоҷикистон ҳузур доранд, ё не.
Нерӯгоҳи ҳастаии “Бушаҳр”-и Эрон, ки дар ҳамкорӣ бо Русия бунёд ёфтааст, дар ҷараёни ҷанги ахири Амрикову Исроил дар Эрон дасти кам 4 мартиба мавриди ҳамла қарор гирифт. Рафаэл Гроссӣ, мудири Оҷонсии байналмилалии нерӯи ҳастаӣ аз ин ҳамлаҳо изҳори нигаронӣ кард, вале онҳоро маҳкум накард.
