Хуҷанд. 26-уми июни с.2008. ОИ «Азия-Плюс»
– Кормандони хадамоти гумруки фурудгоҳи шаҳри Хуҷанд аз сокини шаҳр беш аз 1 кило маводи сахттаъсири ҳероинро, ки ӯ бо мақсади фурӯш ба Новосибирск бурданӣ буд, мусодира карданд.
Аз Раёсати минтақавии хадамоти гумруки вилоят ба ОИ «Азия-Плюс» хабар доданд, ки шаби чоршанбе ҳангоми азназаргузаронии бағочи сокини шаҳри Хуҷанд Азиз Ғаниеви 46-сола халтаи полиэтиленӣ бо арахис ва маводи сафеда дарёфт гардид.
Бино ба иттилои манбаъ, таҳқиқоти лабораторӣ ошкор сохт, ки маводи сафеда ҳероин буда, он 1 килову
161 грамм
вазн дорад.
«Аз рӯи ин далел прокуратураи нақлиёти вилояти Суғд тибқи моддаҳои 200 (Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан) ва 298-и Кодекси ҷиноии ҶТ (Қочоқ, яъне аз сарҳади гумрукии ҶТ гузаронидани воситаҳои нашъадор) парвандаи ҷиноӣ оғоз кард ва тафтишот идома дорад», – афзуд сарчашма.
