Душанбе. 4-уми июл. ОИ «Азия-Плюс» – Ду нафар сокинони қишлоқи Мамадиёи ноҳияи Мӯъминобод Раҳматшо Алиеви 50-сола ва Ҷамшед Давлатови 23-сола бо ҷароҳатҳои бар асари сӯхтор гирифтаашон ба беморхона оварда шуданд.
Муовини сардори қисми сӯхторнишонии минтақаи Кӯлоб полковник Маҳмадулло Бозоров ба ОИ «Азия-Плюс» хабар дод, ки ин ду нафар бар асари ҳодисаи сӯхтор дар нуқтаи фурӯши маводи сӯзишворӣ осеб дидаанд.
«Ҳангоми аз як зарф ба зарфи дигар рехтани бензин ба иллати беэҳтиётии онҳо ду зарф сахт ба ҳам бархӯрда, дар натиҷа шарора ба вуҷуд меояд ва бензин оташ мегирад, ки аз онҳо номбаршудагон зарар дидаанд, – идома дод ӯ. – То расидани мошин аз маркази ноҳия
40 литр
бензин батамом месӯзад ва маблағи хисороти расида 1 ҳазору 500 сомониро ташкил медиҳад».
Дар ноҳияи Мӯъминобод соли равон ин дуввумин ҳодисаи сар задани сӯхтор дар нуқтаҳои фурӯши маводи сӯзишворӣ аст: 27-уми июни соли ҷорӣ дар нуктаи фурӯши маводи сӯзишвории қишлоқи Хонатарош низ сӯхтор сар зада буд, ки аз он фурӯшандаи он Мирмад Исмоилов осеб дид. «Ба ҷабрдида дар ҷои ҳодиса кӯмаки тиббӣ расонида шуд», – изҳор дошт М.Бозоров ва афзуд, ки он замон маблағи хисороти расида ба 300 сомонӣ баробар буд.
