Душанбе. 29-уми июл. ОИ «Азия-Плюс» – Дар минтақаи шарқи ҷумҳурӣ ҳангоми задухӯрди мусаллаҳона бо нерӯҳои низомии ҳукумат роҳбари гурӯҳи ҷиноятпеша Неъмат Азизов ба ҳалокат расид.
Чӣ тавре ки ба ОИ «Азия-Плюс» дар яке аз мақомоти қудратӣ иттилоъ доданд, шаби гузашта дар мавзеи Миёнаду гурӯҳи боқимондаи ҷиноятпешаи Неъмат Азизов ошкор ва ба муҳосира гирифта шудааст. «Ҳангоми задухӯрди мусаллаҳона роҳбари гурӯҳ – Неъмат Азизов кушта шуд», – гуфт манбаъ.
Аз ҷузъиёти дигари амалиёт алҳол чизи дигаре хабар дода нашуд.
Айни замон дар мавзеи мазкур баҳри пайдо кардани дигар ҳаммаслакони Неъмат Азизов корҳои фаврии ҷустуҷӯӣ гузаронида мешаванд.
Тибқи маълумоти мақомоти қудратӣ, сокини деҳаи Пастироғи ҷамоати Сағирдашти ноҳияи Дарвоз – Неъмат Азизови 41-сола солҳои ҷанги шаҳрвандӣ узви фаъоли нерӯҳои муттаҳидаи мухолифини тоҷик буд. Пас аз имзои созишномаи истиқрори сулҳ дар соли 1997, ӯ ба ҳайси фармондеҳи яке аз воҳидҳои Вазорати ҳолатҳои фавқулодда ва мудофиаи гражданӣ дар ноҳияи Тавилдара ифои вазифа мекард.
