Душанбе. 9-уми август. «Азия-Плюс» — | Дар ҷараёни сафар ба шаҳру навоҳии вилояти Хатлон президенти Тоҷикистон аз корхонаи муштараки парандапарварии Тоҷикистону Эрон боздид намуда, ба парандапарварони ноҳия пешниҳод сохт, ки як ошхонаи хусусии тобеъи корхонаро дар маркази ноҳия боз намоянд.
Вале дар мусоҳиба ба хабарнигори ОИ «Азия-Плюс» парандапарварон иқрор шуданд, ки мушкилоте мавҷуд аст, ки маъмурияти корхона имкони ҳалли онро надорад, зеро то ҳанӯз корхона бо маблағҳои масрафшудаи ҷонибиЭрон фаъолият дорад. «Ҳатто мусоидати нахуствазири ҷумҳурӣ кӯмак накард, зеро то ҳол бонкдорон ба мо қарз намедиҳанд», – гуфтанд онҳо.
Президенти кишвар Эмомалӣ Раҳмон ба ҳукумати ҷумҳурӣ супориш дод, ки барои рушди корхонаи парандапарварии ноҳияи Мӯъминобод 3 млн. сомонӣ маблағ ҷудо намоянд.
Дар ҳамин ҳол, дар ноҳияи Мӯъминобод бо иштироки Сарвари давлат Эмомалӣ Раҳмон як сардхонаи бузург, ки барои нигоҳдории 1000 тонна гўшт ва меваю сабзавот пешбинӣ шудааст, мавриди баҳрабардорӣ қарор гирифт.
Ғайр аз ин, мутобиқи супоришҳои сарвари давлат муддати ду соли наздик дар ноҳияи Мӯъминобод мушкилоти таъминот бо оби нӯшокӣ ҳал гардида, дар остонаи таҷлили ҷашни Наврӯзи соли 2012 тамоми пойгоҳҳои обкашӣ барқарор мегарданд ва дар муддати ду сол майдони кишти картшка ду баробар меафзояд.
Эмомалӣ Раҳмон ҳамчунин супориш дод, ки аз фонди эҳтиётии худ барои аз таъмир баровардани беморхонаи касалиҳои сил, сохтмони 40 манзили зист барои табибони ноҳия ва таъмиру тармими роҳҳо маблағҳои зарурӣ ҷудо карда шаванд.
