Тайи ду шабонарӯзи ахир кормандони хадамоти гумруки ҷумҳурӣ беш аз 10 кило маводи мухаддири сахттаъсири героинро мусодира карданд.
Тавре ба ОИ «Азия-Плюс» аз Хадамоти гумруки назди ҳукумати ҷумҳурӣ иттилоъ доданд, рӯзи 23-юми август зимни азназаргузаронии автомашинаи тамғаи «Мерседес» дар роҳи мошингарди Душанбе-Қӯрғонтеппа, дар бордони он ба миқдори 3,5 кило маводи мухаддири героин дарёфт ва мусодира карда шудааст.
«Муайян карда шуд, ки маводи мухаддири дарёфтшуда ба мусофири автомашина С.Ш.-и 43 сола тааллуқ дорад ва ӯ онро нияти ба Русия интиқол доданро доштааст», – гуфтанд дар хадамоти гумрук.
Ғайр аз ин, дар пайи боз як амалиёти кормандони хадамоти мазкур дар шаҳри Душанбе низ 7,2 кило маводи мухаддири героин дарёфт ва мусодира гардид. «Гумонбаршуда – сокини шаҳри Душанбе О.М. низ боздошт шуд», – афзуд манбаъ.
Зикр гардид, ки аз рӯйи ин далелҳо дар мақомоти додситонӣ дар нақлиёт парвандаҳои ҷиноӣ боз гардида, тафтишот идома дорад.
Дар зарфи 7 моҳи соли равон кормандони хадамоти гумрук 7 тоннаву 328 кило прекурсорҳо, 2,6 кило ҳашиш ва 17 кило героинро мусодира кардаанд. Ба гумонбарии даст доштан дар содир намудани ҷиноёти мрбут ба муомилоти ғайриқонунии маводи мухаддир 20 нафар боздошт шудаанд, ки 8 нафарашон занон мебошанд.
