Муовини аввали вазири корҳои хориҷии Тоҷикистон Маҳмудҷон Собиров сафирони Фавқулода ва Мухтори Шветсия ҷ-би Аке Петерсон, Ҷумҳурии Австрия ҷ-би Волфган Баняй, Шоҳигарии Норвегия ҷ-би Оле Йохан Бёрной, Ҷумҳурии Индонезия Фостер Гултом ва Шоҳигарии Испания ҷ-би Мануэл Ларротча Парада, ки дар ҷумҳурӣ ҷиҳати супоридани эътимодномаҳо ба Президенти Тоҷикистон қарор доранд, ба ҳузур пазируфт.
Бино ба маълумоти Вазорати корҳои хориҷии ҷумҳурӣ, сафирон ба муовини аввали вазири корҳои хориҷӣ нусхаҳои эътимодномаҳоро супорида, сипас сӯҳбатҳои кӯтоҳ намуданд.
Дар ҷараёни мулоқотҳо муовини аввали вазири корҳои хориҷӣ сафиронро бинобар ба вазифаҳои зикргардида таъин шуданашон табрику таҳният гуфта, изҳори умедворӣ аз рушди муносибот байни кишварҳо кард. Дар баробари муносибатҳои дуҷониба, ҳамкориҳои судманд дар чаҳорчӯби созмонҳои байналмилалӣ муҳим арзёбӣ карда шуд.
М. Собиров қайд кард, ки новобаста аз сатҳи хуби муносибот миёни кишварҳо, иқтидор ва имкониятҳои мо имкон медиҳанд, ки муносибатҳои мавҷударо дар соҳаҳои гуногун васеътар гардонем.
Бо ин мақсад, муовини аввали вазир таваҷҷӯҳи сафиронро ба устуворгардонии пойдевори шартномавӣ-ҳуқуқӣ, барпо кардани робитаҳо байни доираҳои тиҷоратии кишварҳо, истифода бурдани имкониятҳо барои рушди сармояҳо ва савдои муштарак ҷалб намуд.
Дар анҷоми мулоқот М. Собиров ба сафирон дар иҷрои вазифа ва пешбурди муносибатҳои мутақобилан судманд миёни кишварҳо муваффақият таманно кард.
