Субҳи имрӯз президенти Тоҷикистон Эмомалӣ Раҳмон бо автомашинааш дар шаҳри Душанбе ва чанде аз ноҳияҳои наздики он гаштугузор намуд.
Сардори хадамоти матбуоти сарвари давлат Абдуфаттоҳ Шарифзода ба ОИ «Азия-Плюс» хабар дод, ки ба ин васила президенти мамлакат шахсан бо вазъи ободонӣ ва тозагии пойтахту ноҳияҳо аз наздик шинос шуд.
«Ин бори аввал нест, ки президент дар мошини шахсиаш бидуни муҳофизе дар шаҳр ва манотиқи наздики он гаштугузор мекунад, то ки бо вазъи шаҳру маҳалҳо аз наздик ошно гардад. Чунин гаштугузорҳо қаблан ҳам сурат мегирифтанд. Тамоми мушкилоти мушоҳидашуда сипас аз ҷониби президент дар машваратҳои корӣ баррасӣ мешуданд», – зикр кард Шарифзода.
Дар ҳамин ҳол, ба андешаи бархе аз мушоҳидакорон, сарвари давлат ҳарчи бештар аз воқеъият дур шуда, аз маълумоти боэътимод бобати мушкилоти мардуми тоҷик бархӯрдор нест, зеро мансабдорони давлатӣ ҳама чизро назди президент дар ҳоли «шукуфоӣ» пешниҳод мекунанд.
