Зимни нишасти хабарии имрӯза сардори Хадамоти назорати меҳнат ва шуғли аҳолии Вазорати меҳнат ва ҳифзи аҳолии ҶТ Наврӯз Самадов дар робита ба аз мансаби раиси ШСХК «Барқи тоҷик» сабукдӯш шудани Абдулло Ёров изҳор намуд, ки ӯ бо сабаби боздошти пардохти музди меҳнат ба кормандони ширкат муддати якчанд моҳ аз кор озод шудааст.
Дар посух ба саволи журналистон оид ба тасдиқ далели ҷой доштани мушкилоти якчанд моҳ пардохт нашудани музди меҳнат ба кормандони ширкати «Барқи тоҷик», Самадов зикр кард, ки чунин далел ҷой дошт ва раҳбарияти энергохолдинг муддати 3-4 моҳ маоши кормандонашро пардохт накардааст.
«Тавре ки ба Шумо маълум аст, дар ин робита роҳбари ширкати «Барқи тоҷик» аз кор озод карда шуд. Мо маълумотеро дар ихтиёр дорем, ки мувофиқи он гӯё маош бинобар сабаби таъхир аз ҷониби бонк пардохта нашудааст ва айни замон ин масъаларо мавриди омӯзиш қарор додаем», – афзуд Самадов.
Ёдрас мекунем, ки ахири ҳафтаи гузашта мувофиқи қарори ҳукумати Тоҷикистон, Абдулло Ёров бинобар вазъи саломатиаш аз вазифаи раиси Ширкати саҳомии холдингии кушодаи «Барқи Тоҷик» озод карда шуд. Бо қарори дигари ҳукумати ҷумҳурӣ Аслӣ Назаров раиси ширкати «Барқи Тоҷик» таъин карда шуд.
