Раиси шаҳри Душанбе Маҳмадсаид Убайдуллоев дар бораи кӯчонидани як қатор биноҳои наздик ба майдони «Дӯстӣ»-и пойтахт қарор ба имзо расонид.
Бино ба иттилои як манбаъ аз мақомоти шаҳрдории пойтахт, ба қатори биноҳои бартарафшаванда дар асоси Нақшаи генералии шаҳр бинои мақомоти шаҳрдории пойтахт низ шомил аст, вале дар кадом мавзеи шаҳр сохта шудани бинои нави шаҳрдорӣ ҳанӯз маълум нест.
Тавре қаблан ба ОИ «Азия-Плюс» иттилоъ дода буданд, ба рӯйхати биноҳое, ки дар доираи амалисозии Нақшаи генералии шаҳр бояд кӯчонида шаванд, биноҳои осорхонаи Ҳунарманди мардумӣ Гурминҷ Завқибеков, суди ноҳияи Исмоили Сомонӣ, сафоратхонаи Эрон дар Тоҷикистон, Вазорати кишоварзӣ, прокуратураи пойтахт шомиланд. Ғайр аз ин, боз 39 адад биноҳои истиқомативу таъиноти тиҷоративу иҷтимоии воқеъ дар кӯчаҳои Рӯдакӣ, Бохтар, Пушкин ва Руставели низ кӯчонида мешаванд.
Дар ҳамин ҳол, зимни амалисозии Нақшаи генералӣ чор бинои воқеъ дар маркази шаҳр, ки мероси фарҳангиву таърихӣ маҳсуб меёбанд, кӯчонида намешаванд. Бино ба маълумоти Вазорати фарҳанги ҶТ, биноҳои кохи президент, парлумон, Китобхонаи миллии ба номи Абулқосим Фирдавсӣ ва бинои Театри академии драмавии опера ва балети ба номи Садриддин Айнӣ ба феҳристи мероси таърихии дорои аҳамияти ҷумҳуриявӣ дохил мешаванд.
Ёдрас мекунем, ки раиси пойтахт чандин маротиба изҳор кард, ки ҳамаи ҳуқуқҳои моликони биноҳои мавриди кӯчонидан қароргирифта комилан ҳифз шуда, бо салоҳдиди худ онҳо метавонанд аз рӯйи нархи бозор маблағи пулии онро гиранд ё манзили баробарқимат ба он дар пойтахтро соҳиб шаванд.
