Ҳизби коммунисти Тоҷикистон (ҲКТ) дар анҷумани рӯзи 23-юми сентябри худ бидуни алтернатива муовини аввали раиси ҳизб, вакили палатаи поёнии парлумон Исмоил Талбаковро номзад ба мансаби президентӣ дар маъраки интихоботи қарибулвуқӯъ пешбарӣ намуд.
Зимни сухаронӣ дар анҷуман раиси ҲКТ Шодӣ Шабдолов зикр кард, ки дар маъракаи интихоботи президенти мамлакат ҲКТ барнома ва платформаи худро пешниҳод хоҳад кард, ки пеш аз ҳама ба ҳимоят аз манфиатҳои мардум, ҳифзи иҷтимоии он, таъмини аҳолӣ бо ҷойҳои корӣ, дастрасӣ ба маълумот ва хизматгузориҳои хушсифати тиббӣ, таъмин бо манзили зист равона шудаанд.
Ҳизби коммунисти Тоҷикистон дар сафҳои худ имрӯз расман беш аз 45 ҳазор нафар шаҳрвандони кишварро муттаҳид сохта, ду нафар аз ҳизб вакилони палатаи поёнии парлумон мебошанд.
Қаблан раиси ҲКТ Шодӣ Шабдолов ба ОИ «Азия-Плюс» изҳор дошта буд, ки бидуни тағйироти заминавӣ дар қонунгузории интихобот, бахусус қонун «Дар бораи интихоботи президенти ҶТ», баргузории интихоботи озодонаву демократии сарвари давлат
ғайриимкон аст
.
Ҳамин тариқ, то имрӯз шаш ҳизби сиёсӣ ва Иттифоқи ҷавонони Тоҷикистон номзадҳои худ ба мансаби президентиро пешбарӣ намуданд. Аз ҲКТ Исмоил Талбаков, аз Иттифоқи ҷавонони Тоҷикистон президенти амалкунанда Эмомалӣ Раҳмон, аз Ҳизби ислоҳоти иқтисодӣ раиси ҳизб Олимҷон Бобоев, аз Ҳизби сотсиалистӣ раиси он Абдуҳалим Ғаффоров, аз Ҳизби аграрӣ академик Толиббек Бухориев, аз Ҳизби демократ раиси он Саидҷаъфар Исмонов ва аз Иттиҳоди нерӯҳои ислоҳотхоҳи Тоҷикистон дар ҳайати ҲНИТ ва ҲСДТ Ойниҳол Бобоназарова номзад ба мансаби президентӣ дар интихоботи қарибулвуқӯъ пешбарӣ шуданд.
Санаи интихоботи президентӣ дар Тоҷикистон ба рӯзи 6-уми ноябр таъин шудааст.
