Прокурори дуюм дар парвандаи маҳбусон Суннатулло Ризоев ва Садриддин Тошев аз бурдани парванда барканор шуд.
Тавре ба ОИ «Азия-Плюс» Файзинисо Воҳидова, адвокати Садриддин Тошев хабар дод, дар мурофиаи парвандаи мазкур бинобар сабаби дархости рад шудани прокурор барои дахолат ба мурофиаи судӣ аз ҷониби ҳимоя то имрӯз, 24-уми сентябр танаффус эълон шудааст.
«Пас аз бозпурсии якчанд нафар шоҳидон мо муайян кардем, ки зимни баррасии парванда прокурор Рауфхон Алиев ба шоҳидон таҳдид намудааст, ки баёноти дар тафтишоти пешакӣ додаашонро тасдиқ кунанд ва ба назари ман ҳамчун адвокат, ин дахолат ба мурофиа судӣ аст», – иброз дошт ӯ.
Аввали ҳамин моҳ
дар шаҳри Хуҷанд таҳти раёсати судяи суди шаҳр Улуғбек Мустафоқулов мурофиаи судӣ нисбати маҳбусон Суннатулло Ризоев ва Садриддин Тошев идома ёфта буд.
Нисбати маҳбусон Суннатулло Ризоев ва Садриддин Тошев мутобиқи моддаҳои 21, қ. 1 (Ретсидиви ҷиноят), 332, қ. 2 (Кирдорҳое, ки шахси адокунандаи ҷазо дар ҷойҳои маҳрум сохтан аз озодӣ содир намудаааст) ва 346, қ. 2 (Дидаю дониста расонидани хабари бардурӯғ)-и КҶ ҶТ парвандаи ҷиноӣ боз шуда буд.
Тошев ва Ризоев дар қатори як гурӯҳ маҳбусон тирамоҳи соли гузашта пас аз марги маҳбус Ҳамза Икромзода аз муассисаи ислоҳии №1-и Душанбе ба муассисаи ислоҳии шаҳри Хуҷанд интиқол дода шуданд. Наздикони Ҳамза Ҳакимзода то ҳол мегӯянд, ки дар ҷисми ӯ осори возеҳи шиканҷа ва лату кӯб аён буд, аммо коршиносон сабаби марги Икромзодаро худро ба дор овехтан арзёбӣ намуданд.
