Палатаи поёнии парлумони Қазоқистон лоиҳаи Созишномаи байниҳукуматӣ миёни Қазоқистону Тоҷикистон дар бораи расонидани кӯмаки бебозгашти низомиву техникӣ ба Тоҷикистонро барои баррасӣ қабул кард.
Бино ба иттилои сомонаи расмии парлумони Қазоқистон, ин кишвар ба сифати кӯмак амволи гуногуни низомиро ба ихтиёри Тоҷикистон медиҳад.
Ёдрас мекунем, ки санади мазкур моҳи апрели соли равон дар Душанбе зимни сафари вазири мудофиаи Қазоқистон Одилбек Ҷақсибеков ба Тоҷикистон ба имзо расида буд. Ҳуқумати Қазоқистон имзои санадро ба бунёди заминаи ҳуқуқӣ миёни Вазоратҳои мудофиаи ҳарду кишвар асоснок мекунад.
Дар Созишнома расонидани кӯмаки низомиву техникӣ ба Қувваҳои мусаллаҳи Тоҷикистон бо мақсади таҳкими имконоти мудофиавии ҷумҳурӣ пешбинӣ шудааст. Ба Тоҷикистон ба таври ройгон муҳимоти ҷангӣ, аслиҳа ва дигар лавозимоту таҷҳизоти низомӣ дода мешавад.
Яке аз самтҳои муҳими ҳамкориҳои низомии дуҷонибаи кишварҳо омодасозии кадрҳои низомӣ мебошад. Остона ҳамасола ҷиҳати таҳсили хизматчиёни ҳарбии тоҷик дар макотиби олии низомии Қазоқистон квотаҳо ҷудо мекунад. Ҷонибҳо ҳамчунин имконоти баргузории тамринҳои муштараки низомиро дар нақша доранд.
