– Суҳбати телефонии ахири ҳафтаи гузаштаи сарони кишварҳои Эрону ИМА Ҳасан Рӯҳонӣ ва Барак Обамаро бешубҳа метавон рӯйдоди муҳими миқёси ҷахонӣ ва воситаи сиёсии ҳалли баҳсу мухолифатҳо номид, – изҳор намуд дар суҳбат бо хабарнигори ОИ «Азия-Плюс» сиёсатмадори шинохта, вакили палатаи поёнии парлумони ҶТ Суҳроб Шарифов.
Шарифов мутмаин аст, ки мушкилоти тӯли даҳсолаҳо вуҷуддошта миёни кишварҳо дарҳол пас аз як суҳбати телефонӣ ҳал намешаванд, «вале доир гардидани ин суҳбат, умедворкунанда аст».
«Ба фикри ман, ИМА баъди шикасти сиёсӣ дар баҳси атрофи қазияи Сурия, бахусус бо Русия, сиёсати фишор ба кишварҳои дигарро тағйир медиҳанд, зеро ҷаҳон дар ҳоли таҳаввул қарор дошта, ИМА хеле манфиатдоранд, ки вазъи мавҷуда бо Сурия дигарбора такрор нашавад», – гуфт сиёсатмадор ва илова намуд, ки раҳбарияти Эрон дар роҳандозии сиёсати хориҷии худ масъулияти баланд зоҳир мекунад.
Ба қавли ӯ, дар навбати худ Эрон ба ҷомеаи ҷаҳонӣ бояд собит созад, ки дорои аслиҳаи ядроӣ шуданӣ нест. «Сиёсати хориҷии худро Эрон бояд бештар кушоду шаффоф ба роҳ монад ва ман бовар дорам, ки дар ин самт ӯ аз ҷониби Русияву Чин пуштибонӣ меёбад», – афзуд номбурда.
