Зимни як амалиёти махсуси кормандони Кумитаи давлатии амнияти миллӣ дар Душанбе ба гумони даст доштан дар таҳияи долларҳои амрикоии қалбакӣ се нафар шаҳрвандони Камерун ва як тан аз табааи Гвинея боздошт шуданд.
Бино ба иттилои маркази робита бо ҷомеаи КДАМ ҶТ, нахуст ду нафар шаҳрвандони Камерун боздошт шудаанд, ки моҳи август ба пойтахти Тоҷикистон омадаанд. Аз онҳо коғази махсус, маҳлулҳои кимиёвӣ ва дигар таҷҳизоти тахияи асъори қалбакӣ дарёфт ва мусодира карда шудааст.
Гуфта мешавад, онҳо кӯшиш кардаанд, ки як шаҳрванди Тоҷикистонро бо 50 ҳазор доллари қалбакӣ фиреб диҳанд. Дар ҷараёни тафтишот боз ду нафар – шаҳрвандони Камерун ва Гвинея низ муайян шудаанд, ки онҳо низ бо ин амал машғул будаанд.
Мақомоти КДАМ ҶТ аз ҳамаи шаҳрвандони ҷумҳурӣ даъват мекунад, ки агар дар ин робита маълумоте дошта бошанд ва ё аз амали ин афрод фиреб хӯрда бошанд, ба онҳо муроҷиат намоянд.
